"As Rías Baixas son o noso Amazonas". BAIUCA presenta o seu álbum debut
BAIUCA presenta Solpor, o seu revolucionario álbum debut que che convidamos a escoitar.
O máis avanzado e vangardista da música electrónica e as raíces máis salvaxes e puras de Galicia converxen en Solpor, o revolucionario álbum debut de BAIUCA. Alejandro Guillán, coñecido por proxectos como Alex Casanova, capitanea o grupo que acaba de lanzar as nove cancións producidas polo propio artista en plataformas dixitais.
Solpor (Raso Estudo, 2018), mesturado por Sergio Pérez e masterizado en Irlanda por Stephen Quinn, é un álbum cheo de reivindicación cultural e política e resignificación dos símbolos tradicionais a partes iguais. Cunchas, frautas, gaitas ou pandeiretas combinan con sintetizadores para construír "pontes entre a reivindicación da cultura de raíz e o novo espazo propiciado polo século XXI".
BAIUCA pregúntase como se delimitan as fronteiras entre a música tradicional, a folktrónica, a música de club, a world music, as gravacións de campo e o beat da máquina no que define como un "reinicio neotradicionalista".
O grupo, que declara que "as Rías Baixas son o noso Amazonas", estará o 14 de xullo no Grove presentando o seu álbum debut.
Escribe o teu comentario