​As nevadas non dan tregua e Lugo ten xa case todas as reservas de sal baleiras

|

Nevada quitaneves estradaO sal almacenado resérvase para emerxencias.

Os silos de sal da Deputación de Lugo están a rexistrar problemas de subministración debida á alta demanda polos efectos do temporal de frío e neve que afecta tanto a Galicia como ao resto da Península Ibérica.


O ente provincial conta con 12 silos repartidos por toda a rede viaria de Lugo, cunha capacidade total de 420 toneladas de sal de mina, presentes en Cervantes, Becerreá, Courel, Ribas de Sil, A Fonsagrada, Navia de Suarna, Riotorto, Incio, Ourol, O Valadouro, Lugo e Pedrafita do Cebreiro.


Segundo sinalou o vicepresidente provincial, Manuel Martínez, a pesar de que o domingo estaban todos cheos, salvo o do Valadouro, "a día de hoxe atópanse case todos baleiros". Tamén explicou que algúns deles apareceron con cadeados forzados ou mesmo desapareceron, en concreto na Fonsagrada, Valadouro e Lugo.


"A SUBMINISTRACIÓN NON ESTÁ GARANTIDA"


En total, usáronse 840 toneladas desde a xornada do venres. Doutra banda, o subministrador comunicoulle ao organismo provincial "a imposibilidade" de servir sal "a un ritmo normal" pola alta demanda existente en todo o Estado polo temporal de frío, aínda que tamén porque o sector do transporte "está a pleno rendemento nas obras do AVE".


"Por medio de todas as canles existentes está a tratarse de que o subministrador faga un esforzo extra e en breve contar cos medios adecuados para facerlle fronte ao temporal", asegurado.


Neste sentido, asegura que "nunca vai poñer restricións" ao uso dos seus medios para a asistencia á poboación, aínda que si pediu que os usuarios potenciais realicen "unha comunicación previa" para poder "levar a cabo un adecuado control das existencias".


"Con todo a día de hoxe a subministración non está garantida e o sal almacenado será utilizado para emerxencias concretas", advertiu.


Martínez avanzou, ademais que todas as estradas provinciais "están transitables" neste momento, aínda que si pediu "extremar as precaucións" en toda a rede viaria de Lugo, sobre todo naqueles puntos de maior incidencia climatolóxica.


SEGUE A ALERTA


Para este mércores a previsión meteorolóxica é similar á dos últimos días, con aire frío, chuvascos sobre todo no norte e a cota de neve ao redor dos 300 metros de altura, que ascenderá a 500.


Así, a AEMET ten activada a alerta laranxa na provincia de Lugo por nevadas, á que se suma a alerta amarela por baixas temperaturas, con mínimas ao redor dos 6 graos baixo cero, do mesmo xeito que Ourense.


ALUMNOS SEN CLASE


A presenza de neve na rede viaria galega impediu este martes acudir ás aulas a 667 alumnos de 24 centros educativos da provincia de Lugo, dos cales tres suspenderon as clases.


Segundo os datos facilitados pola Consellería de Educación, este martes foron suspendidas as clases, como xa sucedeu o luns, no CEIP Santa María e no IES Plurilingüe Fontem Albei no municipio da Fonsagrada, con 88 e 96 estudantes afectados, respectivamente.


Ademais, este martes tamén se suspenderon as clases no CEIP Antía Cal Vázquez do termo municipal de Muras, con nove alumnos afectados, segundo os datos de Educación.


relacionada Dúas estradas lucenses permanecen cortadas nunha xornada de frío en Galicia
relacionada A Fonsagrada e Negueira de Muñiz, os municipios máis afectados polas nevadas
relacionada A neve volve ser, unha xornada máis, a protagonista nas estradas galegas

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.
Cabecerarecomendadosgal 2
Cabeceraultimahora 2
Cabeceralomasleidogal 1


Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress