Absolto tras ser acusado de violación por unha viguesa tras ter sexo na súa casa

A sección quinta da Audiencia Provincial de Pontevedra, con sede en Vigo, ditou sentenza na que absolve a un home acusado de agredir sexualmente a unha moza mentres ela estaba durmida, no domicilio del, na cidade olívica.

A acusación particular solicitaba a pena de 4 anos de prisión, mentres que a Fiscalía reclamaba o sobresemento, ao non ver acreditado o delito.

No xuízo, a denunciante explicou que, na mañá do 1 de abril de 2023, espertouse no piso do acusado, onde fora con el e con outro amigo a noite anterior. Segundo a súa declaración, tanto ela como o acusado estaban espidos, e ela tiña molestias e dor na súa zona vaxinal e a súa zona anal.

Pola súa banda, o procesado explicou que, en efecto, ambos mantiveran relacións sexuais, pero que foran consentidas. De feito, o amigo dela que estaba no piso, que declarou como testemuña, sinalou que os viu acariñar mentres vían unha película, e que se foi da vivenda co convencemento de que estaban a ter unha relación íntima de mutuo acordo.

Ante estas probas, e dado que os informes forenses apuntan erosións vaxinais inespecíficas, o tribunal concluíu que a declaración da vítima, única parte acusatoria, adoece de falta de consistencia para crebar a presunción de inocencia máis aló de toda dúbida razoable.

Por contra, a versión da defensa, sinala a Audiencia na súa sentenza, expón unha "hipótese alternativa factible e até razoable". Así, acordou a absolución do acusado, nunha resolución contra a que cabe interpor recurso de apelación ante o Tribunal Superior de Xustiza de Galicia (#TSXG).