Cae unha rede de matrículas falsas para embarcacións en portos que operaba polo menos na Coruña, Mugardos e Fene

A Garda Civil, coa colaboración do Servizo de Gardacostas de Galicia, detivo a dúas persoas nas localidades de Mugardos e Fene (A Coruña), por falsificar a matrícula de dúas embarcacións, e por extraer marisco sen autorización.

Segundo informaron fontes da Comandancia, a investigación iniciouse no principio do ano, cando se tivo coñecemento da existencia dunha embarcación da terceira lista (embarcacións de pesca) que estaba a ser utilizada de forma habitual e sen autorización para a extracción de marisco.

As pescudas permitiron constatar que os sospeitosos movían o barco frecuentemente entre diferentes localizacións para dificultar o seguimento das autoridades. Así mesmo, comprobouse que alteraran a matrícula, inicialmente inscrita como profesional, para simular outra pertencente á sétima lista (embarcacións de recreo).
 

Esta segunda matrícula coincidía con outra que foi localizada no domicilio dun dos investigados, e non se correspondía coa documentación orixinal da embarcación.

O barco investigado foi localizado fondeado na zona de As Xubias, na ría do Burgo (A Coruña), e procedeuse á súa aprehensión. Ademais, tamén se interveu outra embarcación, que presentaba a mesma matrícula falsa, en Mugardos, cerca do domicilio dun dos sospeitosos.

Ademais das embarcacións, a Garda Civil incautouse dun motor fose borda, cuxo número de serie fora borrado. Segundo o informe emitido polas Capitanías Marítimas de Ferrol e A Coruña, ningunha das embarcacións intervidas corresponde á matrícula falsificada, considerando as dimensións, formas e distribución do casco, e ningunha conta coa placa do fabricante.

Aos detidos atribúeselles un delito de falsificación de documentos públicos, oficiais e mercantís. As dilixencias foron entregadas no Xulgado de Garda de Ferrol.