Un porteiro da discoteca Blaster de Santiago enfróntase a catro anos de prisión acusado de agredir a un cliente

Un home que traballaba como porteiro na discoteca Blaster, de Santiago de Compostela, enfróntase a catro anos de prisión acusado de agredir a un cliente en 2019 e empuxalo cara á estrada, onde foi atropelado por un vehículo.

Segundo recolleu o escrito da Fiscalía, o acusado, mentres traballaba como porteiro, encargado do control de accesos á discoteca Blaster, tivo un incidente cun cliente do local, ao que "sacou de forma violenta do establecemento" e, cando se atopaban xa na beirarrúa, "empuxouno e deulle unha puñada na cara".

A vítima perdeu o equilibrio e caeu na calzada, sendo atropelado por un vehículo que circulaba pola vía nese instante.

Por estes feitos, que o Ministerio Fiscal considera constitutivos dun delito de lesións, solicita para o acusado catro anos de prisión, así como inhabilitación especial para o exercicio do dereito de sufraxio pasivo durante a condena e abono de costas.

En concepto de responsabilidade civil, demanda abonar á vítima a cantidade de 7.800 euros como indemnización polas lesións sufridas.

Está previsto que o xuízo se celebre na sección sexta da Audiencia Provincial da Coruña, con sede en Santiago , o vindeiro venres, 17 de novembro ás 09:30.