USO e UXT logran abrir negociación con Xunta para mellorar a situación da seguridade privada nos hospitais galegos

A apertura deste diálogo representa, segundo as centrais sindicais, un paso esperado desde hai tempo. As protestas, que se intensificaron nos últimos meses, quedarán temporalmente suspendidas mentres avance a negociación. Os sindicatos insisten, con todo, en que esta pausa é só provisional e que volverán mobilizarse se non se obteñen resultados “reais e verificables”.

O acordo alcanzado contempla unha folla de ruta con varias reunións técnicas até finais de marzo. Nese momento, as partes realizarán unha avaliación das propostas e determinarán as necesidades específicas de cada hospital e centro de saúde. O obxectivo é analizar a viabilidade das medidas e o seu posible impacto económico sobre o sistema sanitario galego.

Entre os temas centrais da negociación figuran a mellora dos protocolos de actuación, o reforzo da protección xurídica do persoal, a homogeneización de equipos e medios técnicos, así como a revisión do número de efectivos destinados a cada instalación. Estas demandas viñan sendo reiteradas polos traballadores desde hai meses, especialmente tras varios episodios de conflitividade en hospitais como o CHUS ou o CHUAC.

Avances sociais e cuestións pendentes

Unha das áreas con maior consenso é a das melloras sociais, que incluiría a obrigación de que as empresas contratistas ofrezan contratos de substitución, a formación específica en seguridade sanitaria e a actualización dos protocolos de intervención. Ademais, a Consellería mostraría disposición a incluír unha referencia explícita á protección dos vixiantes de seguridade na futura Lei de Saúde de Galicia, actualmente en fase de tramitación.

As cuestións de carácter económico, con todo, preséntanse máis complexas. Os reforzos de persoal ou as subidas salariais requiren dunha análise adicional, xa que non dependen unicamente de Sanidade, senón tamén doutros departamentos con competencias orzamentarias na Xunta de Galicia. Este punto é considerado clave polas organizacións sindicais, que reclaman un compromiso máis amplo do Goberno galego.

Desde #UXT e USO valórase de forma positiva a actitude negociadora mostrada pola Consellería, aínda que ambas as organizacións recoñecen que o camiño será longo.