Descoñecemento e "forte presión social", obstáculos ás mulleres con discapacidade intelectual para ser nai

Os principais obstáculos aos que se enfrontan as mulleres con discapacidade intelectual e do desenvolvemento á hora de ser nais son a falta de información sobre dereitos sexuais e reprodutivos, o descoñecemento sobre métodos anticonceptivos e unha "forte presión social que cuestiona a capacidade destas mulleres para criar aos seus fillos e fillas".

Así o reflicte un estudo realizado por Plena inclusión sobre a maternidade destas mulleres, que conclúe a case a metade delas descoñece que ten dereito a ser nai como o resto de mulleres.

Segundo sinalou Plena inclusión, a maioría das mulleres con discapacidade intelectual e do desenvolvemento non son nais, e moitas delas non o foron por motivos alleos á súa vontade. 

Nesta investigación participaron 315 mulleres con discapacidade intelectual de toda España, das que o 83 por cento non foi aínda nai. O informe combina unha enquisa e entrevistas en profundidade.

Os datos do estudo, recollido por Europa Press, mostran que case o 80 por cento das mulleres enquisadas pensa que a sociedade considera que non deberían ser nais.

"As mulleres con discapacidade intelectual enfróntanse a dous estereotipos contraditorios. Por unha banda, ven influenciadas, como o resto das mulleres, para ser nais nunha etapa da súa vida. E, polo outro, nelas opera o prexuízo estendido que asegura que as mulleres con discapacidade intelectual non deben ser nais", conclúe o estudo.

O informe de Plena inclusión contou coa participación de mulleres con discapacidade intelectual e do desenvolvemento de 16 comunidades autónomas, fundamentalmente vinculadas a entidades do movemento asociativo de Plena inclusión. Todas elas son maiores de 18 anos e residentes en España.

Finalmente, Plena inclusión lembra que "todas as mulleres, con ou sen discapacidade, teñen dereito a decidir sobre a súa vida, o seu corpo e a súa maternidade". Para iso, reclama "máis apoios, información accesible e unha transformación cultural que poña fin aos prexuízos que seguen limitando os dereitos de moitas mulleres".