Alertas de AEMET: onda de calor con avisos por temperaturas de case 40º

A semana comeza cun importante repunte térmico en Galicia. A entrada dunha masa de aire cálido desde o norte de África, combinada coa presenza de altas presións estacionarias ao norte da península, está a provocar un aumento significativo das temperaturas. A Axencia Estatal de Meteorología (AEMET) activou para este luns un aviso amarelo no val do Miño, tanto en Ourense como en Pontevedra, onde se prevé que os termómetros superen os 34 graos a partir de media tarde.

Este luns , os ceos manteranse en xeral despexados, aínda que non se descartan intervalos de nubes baixas no nordeste, especialmente en zonas altas onde podería formar algunha bruma ou néboa. O vento soprará moderado do leste no litoral cantábrico, con refachos fortes entre Ortegal e Fisterra. No resto do territorio, predominarán os ventos suaves do norte.

O ascenso térmico será especialmente notable nas temperaturas máximas. En cidades como Ourense se esperan até 37ºC, mentres que en Santiago e Pontevedra os termómetros poderían alcanzar os 31 e 34 graos, respectivamente. A Coruña e Ferrol rexistrarán valores máis suaves, próximos aos 26ºC.

Martes baixo alerta laranxa por temperaturas extremas

O martes, a situación agravarase en gran parte do interior galego. AEMET elevou a laranxa o aviso no val do Miño de Ourense e Pontevedra, ante a previsión de que se alcancen até 39ºC nalgúns puntos. Noutras zonas como o litoral de Pontevedra, o centro de Lugo, o sur de Ourense e o interior da Coruña, manterase a alerta amarela por valores que poderían superar os 36 graos. As alertas empezan á primeira hora da tarde. 

A xornada estará marcada por unha estabilidade atmosférica xeneralizada. Os ceos manteranse despexados, salvo algunhas néboas matinais en Lugo ou nubes de evolución pola tarde en zonas interiores. As temperaturas seguirán en ascenso, sen cambios relevantes nas mínimas do litoral norte nin nas máximas do extremo occidental.

Os ventos serán en xeral bambos e variables, aínda que nas Rías Baixas espérase a aparición de brisas costeiras vespertinas. Este fenómeno, aínda que moderado, podería proporcionar algo de alivio fronte á sufocante calor. Iso si, non serán suficientes para moderar a calor, AEMET advirte de "noites tropicais".

Mércores de continuidade e novas advertencias por calor

O mércores persistirá o ambiente caloroso, cunha nova xornada de ceos despexados e temperaturas moi elevadas. AEMET emitiu novamente aviso amarelo por calor nas provincias de Ourense e Pontevedra. As máximas seguirán por encima dos 35ºC, especialmente en zonas do interior.

Durante a mañá poderán aparecer algunhas nubes baixas na Mariña Lucense, mentres que pola tarde se formarán nubes de evolución en zonas de montaña do sur e sueste, onde non se descarta algún chuvasco illado. As temperaturas seguirán á alza en case todo o territorio, salvo no extremo occidental, onde podería manter a mesma tendencia que o día anterior.

O vento do nordés seguirá sendo moderado no litoral norte, con refachos fortes entre Finisterre e Ortegal. No litoral das Rías Baixas soprará do sur, de intensidade bamba a moderada, mentres que no interior rexistrarase vento variable e escaso.

Con esta previsión, Galicia enfróntase a unha das primeiras ondas de calor do verán, con condicións especialmente exixentes no sur da comunidade. As autoridades recomendan precaución e especial atención ás persoas vulnerables ante este episodio de calor extrema.