Nais e pais do López Ferreiro de Santiago ven insuficientes os cambios en Edixgal e piden a súa retirada total

O concepto de “modelo híbrido” que promove a Xunta para o próximo curso escolar foi recibido con receo por parte dun grupo de pais e nais do López Ferreiro. Estes proxenitores sosteñen que a reforma anunciada, que permite aos centros educativos adheridos a Edixgal incorporar até tres libros de texto convencionais en Primaria, non resolve os problemas de fondo asociados ao uso intensivo das pantallas na aprendizaxe. Para eles, a decisión da Consellería de Educación responde unicamente á presión social e ás queixas crecentes da comunidade educativa, pero non supón unha solución real nin definitiva.  "Non trátase máis que dun 'parche' para tentar conseguir que máis xente vos apoie", sinala a Galiciapress unha das integrantes do colectivo.

A opción preferida para este colectivo sería a retirada total do libro dixital nas aulas, argumentando que o uso de dispositivos electrónicos non beneficia ao alumnado e pode carrexar consecuencias negativas no seu desenvolvemento. Estas familias consideran que a reforma é insuficiente e lamentan que a decisión final sobre a incorporación de libros en papel quede en mans do colexio. Neste centro, o colectivo crítico tentou que o colexio abondonara Edixgal, sen éxito. Os profesores, que son maioría no claustro polo que teñen a tixola polo mango, non se mostraron de acordo.

A cuestión das axudas para a adquisición de libros de texto tamén suscitou críticas entre as familias do López Ferreiro. Sinalan que, segundo a información facilitada polo propio centro e a Consellería, a pesar do novo modelo mixto prometido desde San Caetano,  o alumnado de 5º de Primaria non poderá acceder a estas axudas, o que consideran unha discriminación inxustificada. 

A polémica ao redor de Edixgal continúa nun contexto de revisión impulsado pola Xunta, que anunciou melloras en cinco ámbitos: contidos, formación do profesorado, benestar dixital do alumnado, seguridade e xestión do programa. A Consellería defende que estas medidas son froito dun proceso de consulta con docentes e familias, e que buscan adaptar o modelo ás novas realidades sociais e pedagóxicas. O Goberno encargou unha enquisa a Sondaxe, rama demoscópica do Grupo Voz, sobre os resultados de Edixgal. A conclusión é que o libro electrónico non supón un lastre nas notas, pero tampouco unha vantaxe. 

A percepción dos pais e nais críticos é que a reforma non aborda as cuestións principais e que a decisión sobre o uso de libros en papel segue dependendo de cada clautro -na práctica dos profesores-. "Non debería ter máis peso a decisión dúas pais, cando vos máis beneficiados/perxudicados, son vos nosos fillos?", argumentan.