Galicia leva 8 días sen un dos seus dous helicópteros do 061, o de Santiago

Galicia enfronta críticas pola ausencia prolongada dun helicóptero medicalizado do 061

O sindicato CIG denuncia incumprimentos contractuais mentres a Xunta defende as medidas tomadas para garantir a cobertura sanitaria.

Desde o pasado 6 de xaneiro, Galicia está sen un dos dous helicópteros medicalizados do 061, servizo esencial para as urxencias sanitarias na comunidade. A aeronave, con base en Santiago de Compostela, foi trasladada a Barcelona para unha revisión técnica, deixando a gran parte do territorio sen esta cobertura aérea. Segundo o sindicato CIG, a empresa concesionaria do servizo, Eliance, está a incumprir a súa obrigación de dispor dun helicóptero de reposto en caso de avarías de máis de 24 horas.

Fontes oficiais do 061 confirmaron a Galiciapress que se espera que o aparello estea operativo esta tarde ou, como moito, mañá pola mañá. Pasarían, por tanto, 8 ou 9 días sen helicóptero de emerxencias sanitarias.

Desde a CIG sosteñen que esta situación non é un feito illado e que, a adxudicataria, Eliance non cumpriu cos pregos do contrato, onde se especifica que ante unha avaría superior a 24 horas debe proporcionar unha aeronave de substitución. Segundo o sindicato, a falta deste recurso afecta a capacidade de resposta en emerxencias en gran parte de Galicia, especialmente en zonas afastadas da base de Ourense, onde se atopa o outro helicóptero operativo.

O sindicato alega que a Fundación de Urxencias Sanitarias 061 limítase a multar á concesionaria pero que non resolve o problema, pois á compañía resúltalle máis barato pagar esas sancións que traer outro aparello.

Resposta da Xunta: "Garantimos a cobertura sanitaria"

Contactada por esta redacción, a Xunta defendeu que a revisión do helicóptero de Santiago é unha medida destinada a reforzar a seguridade tanto dos pacientes como dos profesionais. Nun comunicado, sinalou que as revisións se realizan seguindo as especificacións técnicas recolleitas nos pregos de contratación.

Durante o período en que a aeronave está fóra de servizo, di o 061, as emerxencias están a ser atendidas por unha ambulancia de soporte vital avanzado (#SVA), equipada co persoal médico que habitualmente opera o helicóptero. A Xunta sostén que esta solución asegura a cobertura necesaria para as urxencias extrahospitalarias. Con todo, cae de caixón que unha ambulancia non pode chegar tan rápido onde necesítaselle como un helicóptero.

Ademais, a Fundación Pública Urxencias Sanitarias de Galicia-061 afirmou que aplicará as sancións correspondentes en caso de incumprimento por parte da concesionaria.

Un problema recorrente segundo os denunciantes

O sindicato insiste en que non é a primeira vez que se produce unha situación similar e reclama medidas máis contundentes contra a concesionaria para garantir que as revisións e posibles avarías non afecten á capacidade de resposta do servizo.

A reiteración desta controversia pon de manifesto a importancia de garantir unha infraestrutura sanitaria constante. Que pasaría si durante un destes períodos sen helicóptero do 061 en Galicia hai un accidente como o de Angrois ou un sinistro forestal nun lugar onde non pode chegar unha ambulancia?