Os galegos maiores de 60 anos vacínanse máis contra a covid que a media española

O balance final desta campaña de dobre inmunización en Galicia ofrece 826.155 doses inxectadas contra a gripe, así como 668.176 no caso da covid.

Segundo informa a Consellería de Sanidade, a cobertura de vacinación de covid supera en Galicia a media española entre a poboación diana de máis de 60 anos.

En concreto, no tramo de 60 a 69 anos, a cobertura alcanza o 55,4% en Galicia, 23 puntos máis que o 32,3% de España. Entre 70 e 79 anos é do 69,2%, 17 puntos máis que no Estado (52,2%). E nos maiores de 80 anos chega ao 79% na comunidade galega, é dicir, 14 puntos máis que o conxunto do país (64,3%).

No caso da gripe, o número de dose entre os maiores de 65 anos foi de 522.234 en Galicia, cunha cobertura do 74,4%, cerca do obxectivo fixado do 75% para a campaña e do recomendado pola Organización Mundial da Saúde (#OMS).

Galicia foi pioneira en 2022 en introducir por primeira vez en España a vacinación de gripe en nenos entre seis e 59 meses (5 anos), cunha aceptación do 55,8%, o que Sanidade ve "moi favorable", cun avance dun punto respecto ao ano anterior.

Pola súa banda, os maiores de 80 anos, que este exercicio tiveron indicada a vacinación da gripe de alta carga por primeira vez, contan cunha cobertura do 82,4% (195.909 persoas), sete puntos por encima do obxectivo establecido.