Depakine, Hydrea, Ozempic, Pyler, Brimvera…os medicamentos máis difíciles de atopar no desabastecemento en farmacias

Este 25 de setembro celébrase o Día Mundial do Farmacéutico, unha profesión capital para o noso sistema de saúde pública. Nas farmacias atopamos os remedios ás nosas doenzas, aínda que nos últimos tempos, segundo cal sexa o problema que nos acosa, podemos ter máis dificultades para atopar os produtos que buscamos. Desde a Rede Dixital de Farmacias LUDA Partners, que integra máis de 3.300 establecementos, fai un repaso ás dificultades que atopan os usuarios, moitos con tratamentos que non se poden ver interrompidos. 

A Axencia Española do Medicamento e Produtos Sanitarios (AEMPS) deu luz verde a 33.029 fármacos, pero case un milleiro teñen problemas de subministración, segundo o Centro de Información de Medicamentos. Así as cousas, con estas cifras, unha de cada 35 prestacións ven condicionadas. 

“O desabastecemento de medicamentos é un problema crecente a nivel global que pon en risco a saúde das persoas, especialmente, a daquelas que dependen de medicamentos sen substitutos dispoñibles no mercado”, refiren desde a Rede Dixital de Farmacias LUDA Partners, que pon o acento no “papel esencial e destacado” das farmacias españolas, onde os farmacéuticos son a xanela dos usuarios e teñen que atender as súas demandas da forma máis áxil posible.  

FALTAN ANTIDIABÉTICOS, ANTIBIÓTICOS, CORTICOSTEROIDES…

A falta de medicamentos, inciden, débese a diversos factores, como os problemas de capacidade de produción das compañías farmacéuticas ou un aumento repentino da demanda. Desta forma, nas farmacias buscan remedios para a falta de antiepiléptico, como Depakine, un dos máis demandados para tratar trastornos neurolóxicos e epilepsia, pero tamén antidiabéticos, como Ozempic e Saxenda. A diabetes é unha das enfermidades que conta con cada vez máis pacientes, en gran medida polo noso estilo de vida, e medicamentos como estes axudan aos afectados a manter os seus niveis de forma correcta.

Tamén atopamos desabastecemento en antibióticos , “como varias presentacións de amoxicilina”, Penivel e Pylera, claves na loita contra enfermidades infecciosas. De igual maneira, fármacos para a presión ocular, como Fixaprost ou Brimvera, recetados para persoas con glaucoma, ou corticosteroides, como Celestone Chronodese -moi recetado para combater alerxias, artrites, artroses, problemas cutáneos…- tamén son hoxe escasos. Ocorre o mesmo con medicamentos hemostáticas, como Amchafibrin, “útiles cando hai alteracións na coagulación en situacións como hemofilia, menorragia ou angioedema”.

As farmacias dobraron os seus esforzos para evitar grandes molestias aos usuarios, axudando a miles de pacientes a conseguir os seus medicamentos, como no caso de Hydrea, empregado para pacientes oncolóxicos e que LUDA localizou en máis de 750 ocasións nos últimos meses, evitando que rompa o ciclo do tratamento. 

“Estes resultados reflicten a diversidade de necesidades farmacolóxicas da sociedade e salientan a importancia de garantir unha subministración ininterrompida dos medicamentos para que a saúde dos pacientes non se vexa afectada. Así, os farmacéuticos demostraron en numerosas ocasións ser un dos alicerces fundamentais que liquidan gran parte da problemática non só actual, senón tamén a que vivimos en época de pandemia, e por iso, é un dos gremios mellor valorados polos cidadáns”, conclúe o informe.