Cofano reúne por centos de axentes do sector farmacéutico en Expofarma 2023

Máis de 60 expositores déronse cita nun evento que se expón como unha ferramenta útil para pór en contacto, nun só espazo e durante unha única xornada, aos principais laboratorios de parafarmacia e OTC cos centos farmacéuticos socios da cooperativa.

A cooperativa galega de distribución farmacéutica Cofano reuniu durante este martes, 23 de maio, a máis de 250 axentes do sector, entre representantes da industria e farmacéuticos, en Expofarma 2023, a xornada profesional que organiza xunto ao Grupo Unnefar para as cooperativas socias e que se celebrou no Museo Centro Gaiás da Cidade da Cultura, en Santiago de Compostela.

Máis de 60 expositores déronse cita nun evento que busca ser "unha ferramenta útil para pór en contacto, nun só espazo e durante unha única xornada, aos principais laboratorios de parafarmacia e OTC cos farmacéuticos socios da cooperativa", así como "as novidades de servizos que ofrece a cooperativa en exclusiva para os socios e as Solucións CF para a dixitalización real da farmacia", apuntan os organizadores.

Durante a xornada, ademais do espazo expositivo de laboratorios, desenvolvéronse varios relatorios complementarios. Ao mediodía, Juan do Rio, director xeral do Grupo Unnefar, presentou a primeira sesión formativa impartida polo farmacéutico Jaume Guillén i Relat, quen explicou a importancia dos servizos na farmacia como panca de fidelización cos pacientes.

Pola tarde, o coach, humorista e conferenciante Meigo More foi o encargado de impartir a sesión: 'As claves do poder positivo do cambio', introducido por José Fernández, director xeral de Cofano, quen se dirixiu aos asistentes para clausurar esta edición de Expofarma.