Bo tempo o fin de semana especialmente na costa pero seguirá facendo frío, moito máis no interior

Nin Meteogalicia nin AEMET teñen vixente ningunha alerta para os próximos días, nin en mar nin en terra.  Meteogalicia apunta ademais que as máximas subirán a partir do venres.

A previsión a medio prazo segue apuntando a tempo seco -con algunha posibilida de choiva no extremo norte das provincias de Lugo e A Coruña- , sollío pero tan frío como o actual, incluso un pouco máis.

A costa pode ser unha opción para moitos este fin de semana, pois as temperaturas chegarán a alcanzar alí valores agradables, por exemplo ao redor dos 17 graos en Vigo ou 16 en Pontevedra e o vento non será moi forte.

O frío no interior galego moderouse na madrugada deste xoves en comparación a días anteriores. No entanto, puntos concretos do sur ourensán, aínda en alerta amarela, volveron a rexistrar valores por baixo dos 6 graos negativos.
 

De novo Calvos de Randín notificou a marca da xornada con -7,7 graos ás 7,50 da mañá, de acordo cos valores extremos de Meteogalicia. No entanto, queda lonxe dos -10 da madrugada do martes.

Mentres tanto, en Verín, concretamente a estación meteorolóxica de Vilela, houbo -6,3 ás 9,00 horas. O seguinte valor máis baixo xa son os -4,2 de Viana do Bolo ás 9,20 horas.

Noutras provincias, as xeadas tamén se deixaron sentir no interior de Pontevedra e Lugo. En Lalín, a estación de Mouriscade marcou ás 5,40 horas 3,5 graos baixo cero, mesma temperatura que había nos medidores de Olveda, en Antas de Ulla, ás 8,20.

Así pois, este xoves Galicia continuará baixo a influencia anticiclónica, que deixará tempo seco, ceos despexados en xeral fóra de néboas matinais en puntos do interior. As temperaturas, como xa ocorreu pola noite, poderían experimentar lixeiros ascensos.

O vento soprará de compoñente este e será bambo en terra e moderado no mar, salvo no litoral norte, onde os intervalos poderán ser máis fortes.