Vítimas das gravacións da Maruxaina piden máis seguridade: "Os que nos gravaron seguen na rúa"

Os feitos ocorridos en 2019 seguen pendentes dun proceso penal que se dilatou no tempo e que aínda non levou a ningún dos responsables a prisión.

"Parece que hai algo que non está a ir ben, ou a alguén non lle interesa que isto se tape", suxire Pomba Maseda, unha das moitas vítimas. 
 

Pomba Maseda, unha das numerosas mulleres que en 2019 foi vítima das gravacións realizadas mentres ouriñaban e que posteriormente foron 'colgadas' en webs de contido pornográfico, pediu "máis seguridade" para a festa que se celebrará o vindeiro sábado.

Maseda, de 37 anos e quen xa prestou declaración ante o xuíz de Viveiro que leva esta investigación, tamén apelou á precaución e demandou que haxa "máis baños e máis control".

"Sobre todo, que haxa conciencia de que os que nos gravaron a nós, a día de hoxe, aínda están na rúa. Seguramente sigan facendo o mesmo porque non teñen medo", sentenciou.

Pomba Maseda confesou que se atopa "frustrada" e "enfadada" ao constatar "que pasa o tempo, que volven as festas e agora hai que ver o que está a pasar coas picadas" a mulleres en distintos puntos da xeografía española. "Agora xa saes á rúa, cada vez que vas a unha festa e sales con medo", lamentou.

"Eu na miña vida sentira medo, son unha persoa forte, loitadora e recoñezo que teño medo e medo tamén pola miña xente" engadiu.

"CHEA DE PEGAS"

Pomba Maseda tamén puxo o acento na "chea de pegas" con que se está topando a investigación que leva o xulgado de Viveiro. "Nós entregamos uns vídeos onde podían sacar máis información", indicou.

Esta vítima quéixase que de que "están a poñer pegas por todo e hai moitas cousas que non nos cadran". "Parece que hai algo que non está a ir ben, ou a alguén non lle interesa que isto se tape", suxeriu.

"O que non é normal é que o tema siga paralizado. Estamos moi enfadadas e decepcionadas coa xustiza que brilla pola súa ausencia", lamentou, finalmente, para concluír que, a pesar de todo, este ano volverá participar na Maruxaina.