Pillado en Pontevedra suplantando a identidade doutro no exame de conducir...por oitava vez!

O investigado, veciño de Madrid de 33 anos, contaba con antecedentes por feitos similares en polo menos sete ocasións anteriores. 

A Garda Civil detectou que sobre el pesaba unha orde de procura e detención dun Xulgado de Instrución de Burgos. O home ao que suplantaba, ferrolán de 47 anos, tamén ten antecedentes polo mesmo. 

A Garda Civil detivo o pasado xoves, día 9 de marzo, a un home que suplantó a identidade doutro para realizar o exame teórico do carné de conducir.

Foi na Xefatura Provincial de Tráfico onde axentes, ao finalizar as probas, procederon á identificación dun cidadán, comprobando que utilizaba o DNI doutra persoa.

Tratábase dun veciño de Madrid de 33 anos de idade, ao que lle constaban antecedentes por polo menos outros sete intentos de suplantación polos mesmos feitos. Tras realizar as xestións necesarias, a Garda Civil detectou que había sobre el unha orde de procura e detención dun Xulgado de Instrución de Burgos.

Por iso, foi detido e entregado no Xulgado de Garda de Pontevedra, xunto coas dilixencias instruídas, polos delitos de falsidade documental, así como pola requisitoria xudicial.

En canto ao home que facilitou o seu DNI, resulta ser un veciño de Ferrol, de 47 anos de idade, e que non estaba presente no lugar. A el tamén lle consta un antecedente polo mesmo feito, polo que está a ser investigado por un delito de falsidade documental.