Positivo en alcol e drogas tras saltarse un control e fuxir da policía en Redondela

Un condutor foi interceptado a pasada madrugada despois dunha persecución pola localidade pontevedresa de Rendondela, na que alcanzou unha velocidade de 140 quilómetros por hora, tras saltarse un control policial.

O home tratou de eludir un control que estaba situado nunha travesía da N-550 á altura da Rúa do Muro. A persecución prolongouse durante case 3 quilómetros por camiños da parroquia de Cedeira, segundo informou a Policía Local.

Unha vez interceptado, a policía descubriu que o condutor carecía de permiso de conducir e manexaba un coche coa ITV caducada. Deu positivo na proba de alcoholemia e na de drogas.

Tras inspeccionar o vehículo, os axentes atoparon substancias estupefacientes e un can de "raza potencialmente pelibrosa" que carecía da documentación necesaria.