O PPdeG critica o "bloqueo" do Goberno ao rescate da AP-9

O Goberno de España defendeu que o contrato de concesión da AP-9, que cobre a súa construción, mantemento e explotación, permanece completamente válido até o ano 2048, de modo que “non procede o seu rescate”. A resposta, dirixida a varios senadores galegos do PP, chega nun momento en que se reaviva o debate sobre as peaxes e as prórrogas sucesivas concedidas por distintos executivos.

O Partido Popular cuestiona que o Estado non estude devolver a titularidade pública da autoestrada, lembrando que as ampliacións da concesión aprobáronse tanto con gobernos socialistas como populares. A última prolongación, autorizada durante o mandato de José María Aznar en 2000, ampliou a vixencia até mediados de século.

O PP cifra o rescate en máis de 2.300 millóns

O senador do PP José Manuel Balseiro estimou que o rescate da AP-9 alcanzaría un custo de 2.356 millóns de euros, segundo cálculos da Xunta. “Esa cifra equivale practicamente ao que o Estado prevé gastar en compensacións e bonificacións de peaxe até 2048”, sinalou o parlamentario, quen lamentou que “continúe o bloqueo de Sánchez a unha demanda histórica de Galicia”.

O debate chega despois de que, en xullo de 2025, a Comisión Europea enviase un ultimato ao Executivo español polas irregularidades nas prórrogas das concesións da AP-9 e a AP-66. Bruxelas esixía a España corrixir o que consideraba unha extensión contraria ás normas de competencia europeas.

Bruxelas mantén aberto o procedemento

O Goberno respondeu en setembro cunha documentación “ampla” que, segundo fontes do Ministerio de Transportes, ofrecía todas as aclaracións necesarias para xustificar a continuidade do contrato. Con todo, o Executivo de Pedro Sánchez recoñece que o procedemento de infracción segue en curso e que, mentres non se peche, a información permanece suxeita a confidencialidade, tal e como recolle o seu escrito ao Senado.

Os populares acusaron ao Goberno de “falta de transparencia” e subliñan que o Parlamento galego, co voto favorable de PPdeG, PSdeG e BNG, solicitou a entrega de toda a documentación remitida a Bruxelas. Por agora, o Executivo central non avanzou si fará pública esa información mentres siga aberta a investigación comunitaria.