Cambios na Xunta: oposición pide cesamento da conselleira tras marcha dos directores xerais dos incendios

O final de ano deixou un movemento relevante no Executivo autonómico. O presidente da Xunta, Alfonso Rueda, aprobou este luns seis cambios en postos clave da súa administración, tres deles na Consellería do Medio Rural, a área máis afectada por unha remodelación que chega despois dunha das campañas de incendios máis graves da historia de Galicia, especialmente dura en Ourense e o sur de Lugo.

Entre as substitucións figuran o do director xeral de Defensa do Monte, Manuel Rodríguez, substituído por Manuel Francisco Gutiérrez, técnico do ámbito forestal; o do secretario xeral técnico, Jorge Atán, substituído por Marta Forés Lojo, funcionaria con experiencia en xestión territorial; e o do director xeral de Planificación e Ordenación Forestal, José Luís Chan, cuxo posto ocupará Luisa Piñeiro, exalcaldesa de Moraña e até agora xerente da empresa pública Seaga.

O Goberno galego xustifica os cambios como unha “nova etapa”

Rueda defendeu a reestruturación como unha forma de “impulsar novas etapas” en departamentos sometidos a unha gran presión durante 2025. No caso de Medio Rural, expresou o seu agradecemento aos cesados e subliñou que os novos responsables deberán reforzar os dispositivos de prevención de incendios de face a 2026. O presidente evitou atribuír responsabilidades directas polos erros de xestión, pero recoñeceu que se trata dun ámbito “especialmente exixente”.

Aínda así, a reorganización foi interpretada como un xesto político ante o desgaste provocado polos incendios do verán, que calcinou miles de hectáreas e deixou en evidencia carencias na prevención, coordinación e planificación forestal. Nos últimos meses, numerosos colectivos rurais reclamaran un cambio de rumbo nas políticas do sector.

Críticas do BNG: “Cambiar caras non basta”

Desde a oposición, o #BNG considerou que a decisión de Rueda confirma o “fracaso” e o “desastre” da xestión da área dirixida por María José Gómez, á que acusan de ser a máxima responsable da crise incendiaria. O portavoz nacionalista en materia de medio rural, Secundino Fernández, afirmou que este “cambio de caras de segundo nivel” é “insuficiente” para reverter as políticas “erróneas e negativas” que, ao seu xuízo, marcaron a lexislatura.

Fernández insistiu en que os cesamentos representan só ás “primeiras vítimas políticas” do desastre, pero que os problemas de fondo seguirán mentres non se produza un cambio profundo no modelo de xestión forestal e territorial. “Non basta con substituír nomes —sostivo—, fai falta revisar as políticas desde a raíz”.

O BNG reclama, ademais, unha reordenación integral do territorio galego que aposte pola produción agroforestal sostible e unha defensa “efectiva” do medio rural fronte aos incendios.

O PSdeG denuncia “improvisación e desorde”

Tamén o #PSdeG uniuse ás críticas. O seu portavoz de política forestal, Carmen Dacosta, sinalou que os cesamentos evidencian o “desastre” na xestión da conselleira, caracterizada —segundo dixo— pola “falta de planificación, a desorde e a improvisación permanente”. Os socialistas consideran que a responsabilidade é tanto de Gómez como do propio presidente Rueda.

Dacosta lembrou que as hectáreas queimadas durante o pasado verán demostran o “fracaso” das políticas de prevención e criticou que, a estas alturas, “o Pladiga segue sen publicar”, a pesar de ser unha ferramenta esencial para planificar a loita contra o lume. Para o PSdeG, os cesamentos eran previsibles, pero “chegan tarde” e non abordan o problema estrutural da consellería.

A formación socialista concluíu que o Goberno de Rueda responde o desgaste con medidas cosméticas, sen asumir as responsabilidades políticas que esixen os danos sufridos polo monte galego.

A conselleira salva o posto, por agora

A pesar da presión da oposición, María José Gómez mantense á fronte da Consellería do Medio Rural. A súa continuidade provocou malestar entre as bancadas do BNG e PSdeG, que consideran inxustificable a súa permanencia tras a xestión do verán. Con todo, na contorna do presidente interprétase a súa permanencia como unha aposta pola estabilidade nun momento de transición administrativa.