Arrinca este luns a XII Lexislatura en Galicia coa toma de posesión dos 75 deputados

O Parlamento de Galicia arrinca este luns, a partir das 11,00 horas, a XII lexislatura coa elección da Mesa da Cámara e a toma de posesión dos 75 deputados dos catro partidos que obtiveron representación tras as eleccións autonómicas do 18 de febreiro: PPdeG (40), BNG (25), PSdeG (9) e Democracia Ourensá (1).

Así, tras a lectura do acordo da xunta electoral polo que se fan públicos os resultados dos comicios, constituirase a Mesa de Idade, que estará presidida polo deputado lucense electo polo Partido Popular José Manuel Mato Díaz. Este político lucense, que foi alcalde de Paradela desde 1979 até a súa dimisión a principios deste ano para concorrer nas listas do PP ás eleccións autonómicas, cumprirá o próximo mes de maio 70 anos de idade.

Ademais, actuarán como secretarios deste órgano, ao ser os membros da Cámara máis novas, o parlamentario electo do BNG pola provincia de Lugo Iago Suárez, nacido en Chantada en agosto de 1997; e o deputado popular electo pola provincia de Pontevedra Raúl Santamaría. Este último, coñecido polo seu papel como un dos 'Mozos de Arousa' nun programa de televisión, cumprirá o próximo 7 de abril 26 anos.

A continuación procederase á elección dos membros que formarán parte da Mesa do Parlamento, o órgano reitor da Cámara, que volverá estar presidida polo popular Miguel Santalices, acompañado de novo na vicepresidencia primeira pola deputada do PP pola provincia de Lugo Elena Candia e na secretaría primeira por Ethel Vázquez, até o momento conselleira de Infraestruturas e Mobilidade.

Esta foi a proposta avanzada este domingo polo PPdeG, o que anticipa, coa entrada de Ethel Vázquez na Mesa, os primeiros cambios de Goberno da Xunta que prepara Alfonso Rueda.

#BNG E PSDEG
Así as cousas, quedan por resolver os nomes que ocuparán a vicepresidencia segunda e a vicesecretaría que, de acordo co debuxo electoral, corresponderían ao BNG.

Con todo, o PSdeG reclama que a Mesa reflicta a pluralidade da Cámara, para o que os nacionalistas terían que cederlle un posto. Neste sentido, preguntado polas negociacións para abordar este asunto, o candidato socialista á Presidencia da Xunta e deputado electo pola provincia de Lugo, José Ramón Gómez Besteiro, asegurou que era un asunto que se tiña que abordar con discreción no marco dos contactos entre partidos.

Pola súa banda, a portavoz nacional do BNG, Ana Pontón, dixo que a posibilidade de ceder un posto ao PSdeG, como ocorreu hai catro anos, sería unha decisión que sairía dos órganos directivos da formación frontista. Aínda que subliñou que a que se abrirá a próxima semana é "unha lexislatura diferenciada" na que existe unha "gran distancia" a nivel aritmético entre o Bloque e os socialistas.

Para a elección da Mesa, faranse tres votacións en urnas separadas: unha para elixir á persoa que ocupará a Presidencia, outra para escoller á vicepresidencia primeira e á vicepresidencia segunda, e unha terceira para designar ás persoas que ocuparán a secretaría e a vicesecretaría.

DISPOSICIÓN DO HEMICICLO
A sesión finalizará cunha breve intervención da persoa que ocupará a Presidencia do Parlamento, Miguel Santalices, tras o que se procederá á interpretación do himno galego.

Nesta primeira sesión da Cámara galega tras as eleccións autonómicas do pasado 18 de febreiro os deputados estarán sentados conforme ao decidido pola mesa da Deputación Permanente a principios desta semana, que fixo unha asignación provisional.

Con todo, a distribución definitiva será efectuada por parte dos órganos da Cámara saíntes da sesión de constitución e conforme á comunicación que fagan os grupos.