Gonzalo Busqué (Rexurdir Podemos Galicia): "Non é certo que existan 65 círculos activos"

Neste diálogo, Gonzalo Busqué Lorenzo non se pecha de plano a unha posible alianza co proxecto Sumar de Yolanda Díaz, pero remite as decisións que respecto diso se tome a nivel estatal, destacando o liderado de Ione Belarra. 

A suposta falta de independencia do actual aparello de Podemos Galicia nestas primarias, a estratexia de face ás eleccións locais e o exame da vida interna azamboada no país son outro dos puntos desta conversación.

Rexurdir Galicia é unha das listas que compite nas primarias de Podemos Galicia, nas que tamén participa unha lista que poderiamos tachar de continuista, pois en Tecer participa Antón Gómez-Reino, o actual portavoz. Como lle explicaría aos inscritos en Podemos Galicia as diferenzas ideolóxicas entre unha e outra candidatura?

• Non hai diferenza ideolóxica senón máis ben de idea de facer política. Nós non cremos que a renovación teña que ver coa idade nin coa substitución xeneracional, senón máis ben coa substitución da idea de facer política. Non facer continuísmo dunha política que levou á case desaparición de Podemos Galicia como espazo político.
•  

E cales son as diferenzas a nivel estratéxico? En particular, no referido ás súas críticas ao proxecto Sumar de Yolanda Díaz. Non sería contraproducente para os resultados electorais da esquerda rupturista que o voto se dividise entre candidaturas de Sumar en Galicia e de Podemos Galicia?

• Nós nunca criticamos o proxecto de Yolanda Díaz, é máis, mantemos que hai que ter unha proxección de futuro, no que a esquerda xunte forzas para levar a cabo políticas sociais para mellorar a vida da xente. E como partido, xa que pertencemos a Podemos, aínda sendo unha corrente crítica co facer da anterior dirección de Podemos Galicia, facemos noso o posicionamento do noso partido con Ione Belarra á cabeza. 

Cal é a súa postura ca vista nas eleccións locais da próxima primavera? Podemos Galicia xa ten listas en numerosos concellos. Debe haber negociacións con outros colectivos, como as mareas da Coruña ou Santiago, para tentar pactar listas conxuntas?

• Quen estivo en política sabe que non é o mesmo a política autonómica que a municipal. Somos da crenza de que as listas se forman nos Concellos por xente que coñece a súa contorna, e ten o municipalismo como horizonte para levar a cabo políticas enfocadas a que o cotián funcione. E sempre seremos moi respectuosos coas listas xa feitas e que cada Círculo negocie ou pacte listas que. unha vez máis, sirvan para frear políticas de dereita que frean a evolución de concellos pequenos, e frean a capacidade de implementar melloras para a cidadanía. Políticas afastadas de redes clientelares, tan asentadas no noso territorio. 

Vostedes denunciaron que a organización de Podemos Galicia manipulou o proceso electoral ao non enviar un correo de aviso aos inscritos sobre a apertura do proceso. Está a ser un proceso limpo?

Está a ser un proceso no que se obviaron algunhas cuestións, por exemplo que a candidatura saínte, teña ao seu servizo todo o aparello de propaganda do partido, así como o traballo de persoal asalariado, facendo que a súa candidatura sexa máis visible, e en detrimento de a visibilidade da nosa, ao carecer do apoio fundamental de profesionais que manexan as redes sociais, e os contactos a nivel prensa, radio e TV. Contactos cos que aos poucos nos fomos facendo pero que nos custou un traballo puramente persoal da cabeza de lista e dos e as demais membros da candidatura, que carecemos dese apoio. 

As últimas enquisas indican que Podemos non sacaría ningún deputado nas provincias de Galicia nos xenerais de 2023, cando agora ten dous, un pola Coruña e outro por Pontevedra. Sorpréndelles estas previsións? Como as valoran?

• As enquisas, como todas, son iso, enquisas, e dependendo de quen as fagan dan un resultado ou outro. En todo caso, este resultado que se augura nas que vostede menciona, non son senón o resultado da nula política levada a cabo pola anterior dirección de Podemos Galicia, que o único que conseguiu é a desaparición de círculos activos, polo hastío e desencanto dos inscritos, as inscritas e militantes, ao ver o deixamento de funcións e a falta de actividade propia dun partido. Cun secretario xeral desaparecido en Madrid, e un secretario de organización que se limitou a vivir en Santiago sen implementar arraigamento nos círculos do territorio da nosa comunidade autónoma. Non é certo que existan 65 círculos activos, e isto é un feito.