CC.OO. di "non" a modificar o acordo regulador ata que o Concello de Ourense "pague todo o que debe"

As débedas no Concello de Ourense van saírlle moi caras ao goberno municipal. O paso do tempo non está a aliviar nin moito menos a incerteza financeira do goberno de Gonzalo Pérez Jácome, senón que cada vez son máis as críticas á xestión do líder de Democracia Ourensá, que con todo parece que reterá o bastón de mando tendo en conta que os intentos por impulsar unha moción de censura fracasan pola falta de unidade das forzas políticas. Onde si pechan filas é no sindicato Comisións Obreiras, que nos últimos meses han implementado unha verdadeira oposición a Jácome en defensa dos traballadores municipais e os pagos que aínda quedan pendentes abonar.

"PASOTISMO DO CONCELLO"

Así, e despois da Mesa de Negociación, CC.OO., xunto a CSIF , lograron tombar co seu "non" os puntos da orde do día en resposta ao "pasotismo do Concello ante a falta de pagamento dos pluses dos bombeiros", unha crise que arrastran desde a primavera pasada e que ten ao persoal dos profesionais na loita contra os incendios sen percibir a totalidade da retribución que lles corresponde, feito que tivo consecuencias tamén sobre a nómina dos axentes do corpo da Policía Local. 

"CC.OO. non apoiou nin apoiará a modificación dos artigos 22 e 23 do acordo regulador, mentres non pague aos traballadores as horas extras, pluses, axudas convenio ou a subida salarial aprobada polo Goberno de España", reitera o sindicato, que leva meses loitando pola situación na que se atopa o colectivo e que, como ben precisaron a Galiciapress no seu día, parece que vai para longo, xa que a falta dunha importante inxección de capital para asumir estes desembolsos, desde o sindicato recoñecían que a situación podería enquistarse até, polo menos, "pasado o verán". 

"Estamos fartos que desde a alcaldía fagan o que lles da gana, sen contar cos sindicatos, por exemplo, os nomeamentos a dedo, que están no xulgado denunciado por CC.OO. ou, por exemplo, impedir ao persoal interino e laboral acceder ao concurso do plan de estabilización de emprego do Concello de Ourense, que está aprobado en Mesa de Negociación e publicado no BOP o 31-12-2022", reiteran, lembrando que quedan só uns meses de prazo para poder axustar ao plan de estabilización e asegurando que non lles tremerá o pulso se teñen que recorrer por máis veces á Xustiza.