Outra multa ao coche oficial de Jácome, alcalde de Ourense, en Vigo por exceso de velocidade segundo unha denuncia

O coche no que adoita circular o edil de Ourense foi pillado, outra vez, a unha velocidade inadecuada un día non laborable fose da cidade. Con esta son dúas multas coñecidas nun moi curto período de tempo en semellantes circunstancias. 

O Concello de Ourense volveu a ser notificado cunha sanción de 100 euros polo exceso de velocidade en Vigo do coche institucional do goberno local, o mesmo no que habitualmente viaxa o rexedor auriense, Gonzalo Pérez Jácome, segundo revela Noticias Dispersas. Galiciapress contactou co municipio para coñecer a versión do goberno local sen recibir resposta por agora.

É a segunda sanción nun curto período de tempo contra este vehículo e tamén por conducir a unha velocidade superior á permitida.

Os supostos feitos desta última multa remóntanse ao sábado 4 de febreiro, ás 16:53 horas en Vigo. O Peugeot 208 5P Active, de cor mostaza, circulaba a unha velocidade de 94 quilómetros por hora nunha zona cunha limitación de 80 km/h. O coche foi detectado a esa velocidade no quilómetro 7,7 da A-55, pouco despois de Puxeiro.

A sanción notificada é de 100 euros -cunha redución a 50 euros por pronto pago- coincide no tempo cunha viaxe de Jácome á cidade olívica, onde foi visto nunha superficie comercial xunto a Eloy Mouteira, o seu xefe de comunicación, até agora ausente por unha baixa.

SEGUNDA MULTA COÑECIDA

Segundo apuntan medios locais como A Rexión a notificación abriu unha nova investigación dentro do propio Concello, con Jácome tratando de destapar á persoa ou persoas que se encargaron da filtración, que antes foi publicada desde a canle satírica de Noticias Dispersas, onde comentan a coincidencia no tempo desta sanción coa ocorrida o pasado 2 de setembro en Samil contra o mesmo vehículo oficial.

Entón o coche infractor superou en 30 quilómetros por hora a velocidade permitida nun tramo limitado a 50 km/h. O Concello non identificou ao condutor do vehículo, polo que a sanción, de 400, pasou a ser catalogada de "moi grave" e ascendeu até os 1.200 euros. 

O alcalde respondeu cando foi cuestionado pola prensa por esta primeira denuncia que o concello ía identificar ao condutor infractor pero até agora non transcendeu que o fixo.