Medio Rural informa dun novo incendio activo en Viana do Bolo
A Consellería do Medio Rural informou tamén de que o incendio de Lobeira, que afectaba o Parque Natural de Baixa Limia-Serra do Xurés, atópase finalmente extinguido desde as 20:45 horas de onte
Medio Rural informou que desde as 21:51 horas da noite de onte hai un novo incendio activo en Galicia. O lume comezou na parroquia de Grixoa, no municipio ourensán de Viana do Bolo e calcinou xa un total de 80 hectáreas, case tantas como o incendio declarado en Porto do Son, que leva activo desde o sábado.
Aos labores de extinción deste lume destináronse un técnico, 5 axentes, 13 brigadas, 11 motobombas e 2 pas.
Doutra banda, a Xunta informou de que, tras 4 días de lume, finalmente deuse por extinguido ás 20:45 horas de onte o incendio de Lobeira, que se iniciou na parroquia de San Xes de Vilariño e afectou ao Parque Natural de Baixa Limia-Serra do Xurés.
Este incendio calcinou un total de 625,2 hectáreas de terreo, das cales 46,36 eran de monte arborizado e 578,84 de monte raso.
Doutra banda, o incendio de Porto do Son, na Coruña mantense estabilizado desde as 19:15 horas de onte, como xa informara a Consellería do Medio Rural no seu último parte da pasada xornada. Neste incendio traballan actualmente un técnico, 21 axentes, 43 brigadas, 27 motobombas, 4 pas, 5 avións e 5 helicópteros.
Escribe o teu comentario