Incendio nun aeroxerador no parque eólico de Penedo do Galo, en Viveiro

O lume provocou que unha pequena zona de monte raso sufrise as consecuencias, pero os servizos de extinción lograron que non se propagase. 

O fume do incidendio púidose ver desde distintos puntos da zona e foron moitos os particulares que chamaron alertando da situación.

Un aeroxerador no monte Penedo do Galo, en Viveiro , ardeu este martes, o que afectou a unha zona "reducida" de masa forestal, que xa foi apagada, segundo recolle o parte da Central de Atención ás Emerxencias 112.

Fontes da Consellería de Medio Rural confirmaron a Europa Press que o lume do molinillo provocou un conato de incendio que calcinou 0,1 hectáreas de monte raso.

Así, mentres que o aeroxerador ardeu por completo, os servizos de emerxencias traballan para extinguir os últimos focos, de carácter residual.

Múltiples particulares chamaron ao 112 Galicia ao fío das 10,30 horas para informar de que estaba a arder un aeroxerador situado no monte Penedo do Galo, o que provocou unha densa fumareda visible desde varios puntos.

Instantes despois, o lume propagábase á zona de monte. Desde o Servizo Municipal de Protección Civil de Viveiro confirmaron que nas proximidades non había persoas afectadas nin edificacións.

No operativo participaron Urxencias Sanitarias de Galicia-061 de maneira preventiva, a Policía Nacional, os Bombeiros de Viveiro, a Policía Local e Protección Civil do municipio, así como as autoridades medioambientais da Xunta de Galicia e efectivos do distrito forestal da zona.

Os servizos de extinción encargáronse de controlar o lume, que se rexistrou entre as 10,40 e as 13,27 --cando se deu por extinguido-- tras propagar polo monte. Os efectivos de Medio Rural, que mobilizou a un axente, unha brigada e unha motobomba, foron os encargados de delimitar o punto.