Ofrecen 6.000 euros de recompensa para aquel que atope ao octoxenario perdido en Friol hai 20 días

A familia do desaparecido e o Concello de Friol ofrecen 6.000 euros á persoa ou persoas que atopen a José Luis Iglesias. 

O home, octoxenario, desapareceu da súa vivenda o pasado 4 de setembro. O seu coche foi atopado nunha pista forestal da parroquia de Carballo.

A familia e o Concello de Friol ofreceron unha recompensa de 6.000 euros a quen dea co paradoiro de José Luis Iglesias, un octoxenario desaparecido do seu domicilio neste municipio lucense desde hai máis de 20 días.

Tratan así de reactivar a procura do home, que foi visto por última vez o pasado 4 de setembro e cuxo vehículo se localizou nunha pista forestal da parroquia de Carballo, onde residía e tiña leiras.

Tras máis de dúas semanas sen avances, os fillos do home, xunto co Concello de Friol, decidiron ofrecer unha recompensa económica a quen dea co desaparecido.

Desde que se dese a voz de alarma sobre a súa desaparición leváronse a cabo numerosos operativos de procura, nos que, ademais de voluntarios e familia, participaron axentes de Protección Civil, Garda Civil e GES, así como unidades caninas de rastrexo, helicópteros e mesmo os drons da Axega, aínda que sen éxito.

O pasado 10 de setembro, un transportista dixo ver ao home na zona da parroquia de Condes, polo que a procura ampliouse a esta área e aos concellos limítrofes de Guntín e Palas de Rei.

Os familiares do desaparecido, que agradeceron a participación de todos os que integraron os dispositivos de procura, confían en que a recompensa atraia a máis persoas, mesmo especializadas en desaparicións, para poder dar co home.