Gran seguimento e piquetes na estación durante a folga de Alsa en Ferrol
As mobilizacións comezaron moi cedo nuns paros que serán indefinidos ata que Maiturs, filial de Alsa, non asine o convenio.
Sen que despuntase a alba, as protestas na estación de autobuses urbanos de Ferrol xa arrincaran este luns, primeiro día de paros na cidade departamental pola protesta convocada polo sindicato #CIG no servizo do transporte que presta Alsa.
O sindicato reclama ao responsable do servizo que se aplique o convenio provincial do transporte de viaxeiros. A mobilización, de carácter indefinido e que afecta á filial do grupo asturiano, Maitours, así como á outra empresa que conforma a UTE do contrato, Intercar, arrincou cedo cun nutrido grupo de folguistas na estación de buses, desde onde sairán os transportes para garantir os servizos mínimos. Hai uns 40 operarios da firma chamados a secundar os paros.
No entanto, nos servizos mínimos establecidos, algunhas liñas, como as de traslado ás praias ferrolás, non operarán estes días, algo que pode causar algún que outro inconveniente, sobre todo se mellora o tempo e o clima empeza a ser propio do verán.
Xesús Pastoriza, da CIG, acusou a Maitours de atopar "escusas" para "non sentar e asinar o convenio provincial a pesar de que xa está todo acordado e que as táboas salariais xa foron publicadas". "Só queda unificar o actual convenio prorrogado e as novas táboas nun documento a asinar por ambas as partes; canto máis se tarde en asinar, maiores serán os atrasos que teña que pagar Maitours", debulla.
Escribe o teu comentario