Protesta ante o Pazo do Hórreo ontra o ERE de Circet que amenza 118 empregos en Galicia

Traballadores de Circet concentráronse este mércores na entrada do Parlamento de Galicia para mostrar o seu rexeitamento ao ERE que afecta a máis de 300 empregados, deles, 118 en Galicia.

O secretario comarcal de Industria da #CIG en Compostela, Benedito Blanco Lema, explicou que a empresa "o que quere é que traballen a xornada partida" e por "produción", é dicir, "que os traballadores cobren polo número de altas que dan", o que, segundo o representante sindical, suporía facer "horas extra encubertas".

Á súa vez, Branco sinalou que "non ve claro" que se teña que facer un ERE cando teñen contabilizados "entre 40 e 70 persoas en subcontratas" cunhas condicións "moi malas" e que "non reúnen as medidas de seguridade".

Así, asegurou que na negociación "todo vai ligado" a dúas cuestións: "ou rebaixar as condicións ou facer despedimentos". Neste contexto, detallou que hai oito días trasladaron a súa situación á ministra de Traballo, Yolanda Díaz, que, segundo destacou, "comprometeuse a facer algo", pero polo momento os traballadores non ven "ningún avance".

"A reforma laboral de Yolanda Díaz está a dar os froitos que seguía dando a mesma reforma que fixo o PP no seu momento", lamentou Branco.

Este venres celébrase en Madrid a "última reunión" para negociar este ERE e a empresa, sostivo o representante da CIG, "segue no seu trece, dicindo que si hai un acordo a traballar por puntos, entón si que está disposta a rebaixar o número de despedimentos".

DEBATE NO PARLAMENTO

Coincidindo con esta protesta ás portas do Parlamento, na Cámara galega o deputado do BNG Ramón Fernández Afonzo preguntou ao conselleiro de Emprego, José González, sobre a postura e as previsións da Xunta ante o expediente de regulación de emprego presentado por Circet.

Así, o titular de Emprego lamentou a decisión da compañía de presentar este ERE, pero insistiu en que "a autoridade laboral competente é o Ministerio de Traballo", xa que "ten centro de traballo en varias comunidades".

Por tanto, reiterou, "a tramitación do ERE correspóndelle á administración xeral do Estado". Nesta liña, criticou que o Goberno "ten obrigación de comunicalo ás comunidades afectadas" algo que, segundo denunciou, "non se fixo".

En todo caso, manifestou que a Xunta solicitou o pasado 27 de novembro información e, polo momento, "o único" que se lles trasladou é que "hai 118 persoas afectadas en Galicia".

Así mesmo, comprometeuse a "velar" porque a situación se resolva "da maneira máis favorable posible para os traballadores galegos".

No marco deste debate parlamentario, o deputado do BNG aproveitou para instar "ao PSOE e a Yolanda Díaz a que derroguen a reforma laboral de M. Rajoy" que, na súa opinión, non evita circunstancias como esta.