Darío Janeiro, PuntoGal: "o comprador dun dominio .gal é un comprador consciente"

-PuntoGal cumpre unha década e é un bo momento para recapitular e facer balance. Cal sería a valoración que realizarías sobre estes dez anos de PuntoGal?

Realmente estamos moi contentos co resultado. Non foi un camiño fácil pois houbo que articular a candidatura, realizar un traballo previo para conseguir que alguén aprobase un dominio destinado a un lugar como Galicia. Foron moitos quebradizos de cabeza para todas as persoas que investiron moitas horas de talento e traballo sen ningún tipo de compensación. Algunhas desas persoas continúan en PuntoGal e outras non, pero debemos agradecerlles o seu traballo igualmente. Por outra banda, foi moi satisfactorio que Galicia teña un dominio propio, algo do que non todos poden presumir. En relación ao traballo posterior á aprobación do dominio, efectivamente, hai cousas que consideramos positivas. Unha delas é posuír un parque de 7.200 dominios e dentro deles están a maioría de administracións públicas, por outra banda, tamén existen outros sectores que utilizan o dominio de forma habitual. Engadimos a isto que somos unha entidade sen ánimo de lucro sustentada sobre os seus propios recursos, algo do que sentimos orgullosos. Por tanto, hai resultados moi positivos e noutros che gustaría mellorar como ter unha maior penetración dos dominios no país, ou en determinados sectores onde queremos expandir a nosa presenza.
 

-Como presentarías ou explicarías que é PuntoGal a quen non o coñeza aínda?

PuntoGal é, sobre todo, unha ferramenta para construír o teu espazo en Internet colocándolle unha marca de orixe, un ADN. Cando compras un dominio PuntoGal sinalas cal é o teu lugar no mundo dentro dunha comunidade. Ademais, axudas a crecer a un proxecto que ten o seu eixo de funcionamento en Galicia que, por outra banda, tamén ten entre os seus obxectivos fundacionais o reverter os beneficios que vai obtendo en iniciativas dentro do ámbito da cultura, lingua e tecnoloxía. 

-Entre o 29 de novembro e o 1 de decembro vaise a celebrar a mostra Culturgal. O día 30 de novembro será a feira de PuntoGal dentro de devandita mostra. Cales son os nexos de unión entre un e outro?

A celebración de PuntoGal é algo máis que o acto festivo dentro do Culturgal. Este pasado martes 15 de outubro participamos nunha recepción dentro do Parlamento de Galicia. O motivo é que coincidía co décimo aniversario da Declaración Institucional do Parlamento a favor do dominio PuntoGal. Por outra banda, a celebración en Culturgal vai estar acompañada dunha oferta especial para a compra de dominios, do lanzamento dunha páxina específica para entidades como asociacións ou ONGs para obter os dominios dunha forma máis económica. Xunto a isto celebraremos varias actividades dentro do Culturgal, entre outros eventos, celebraremos un minifestival con música o sábado 30 de novembro pola tarde. O domingo día 1 de decembro daremos paso a unha xornada que abordará a situación de Internet en Galicia e onde falarán diversos expertos e expertas sobre esta cuestión. A maiores, organizaremos outras actividades xunto a persoas e organizacións ás que nós apoiamos e coas que colaboramos. Por que facemos todo isto en Culturgal? Porque cremos que é o lugar natural para PuntoGal e outras industrias culturais, porque é o lugar onde está moita da xente coa que compartimos tarefas, porque é unha feira aberta a todo o mundo e isto motívanos para crear un ambiente divertido para as persoas que acudan.

-PuntoGal recolle un total de 7.200 dominios e unha taxa de renovación do 90%, Que explicación daríalle a este comportamento?

Normalmente, o comprador dun dominio .gal é un comprador consciente. Desde logo o noso parque de dominios non é igual ao de .com que está xestionado por unha multinacional cos seus intereses empresariais. Nós somos unha entidade moito máis pequena e que serve a un país con menor poboación, por iso a xente que compra o dominio sabe o que está a comprar e utilízao para o obxectivo que sexa. Até agora non detectamos compras para especular, por exemplo, é un dominio moi controlado porque sabemos onde están eses 7.200 dominios e iso vólveo máis seguro. Con todo, isto non significa que non haxa xente dar de baixa máis tarde.
 

-Apuntaches á declaración institucional do Parlamento. Aínda así, houbo algún elemento refractario ao uso de .gal?

Podo dicir que realmente non. Sempre hai xente máis ou menos entusiasta con determinados proxectos. Durante o longo traxecto para a creación do dominio traballamos co bipartito e cos distintos gabinetes do PP e debo dicir que neste caso concreto, nunca tivemos un especial problema, todo o contrario, un forte apoio para a súa posta en marcha. No seu momento a Xunta publicou un decreto para que toda a administración autonómica usase o dominio .gal. 

-Que impresión levástesvos ante as reaccións de institucións culturais, sociais e políticas ante a aparición dun dominio definitorio de Galicia?

Polo que vivimos nestes dez anos, o dominio foi ben recibido sempre. Falo de diferentes entidades, culturais, empresariais ou concellos. Nunca tivemos unha resposta negativa no sentido de “é unha bobada”. Hai quen non deu o paso para cambiar o dominio pero aí podemos atopar todo tipo de explicacións. E doutra banda, no ámbito da cultura e a lingua temos unha presenza moi alta.

-Se comparamos .gal con outros dominios como .eus ou .cat, estes dous últimos teñen un maior número de dominios. Que visión de ofrece esta comparativa?

Hai diversos motivos, por exemplo, .cat é un dominio con moitos máis anos de funcionamento detrás. En xeral, hai numerosas razóns para que un dominio teña máis seguidores que outro. Nós adoitamos colaborar con asociacións nas que nos atopamos con .eus e .cat, de feito participamos nas reunións de rexistradores. Tamén estamos na asociación que engloba a todos os dominios culturais, de cidades e xeográficos. Todos colaboramos en diferentes iniciativas, traballamos conxuntamente pero cada lugar é un mundo. A nós interésanos continuar co crecemento, todos os anos acabamos en saldo positivo de dominios e a taxa de renovación é dun 90%. Gústanos compararnos connosco mesmos e oxalá algún día poidamos ter os cen mil dominios que teñen os cataláns.

-Por último, cal é o futuro do dominio .gal para ti?

Non sei cal será o noso futuro pero si que sei cales son as nosas liñas de traballo, concretamente, son tres. A primeira é a relacionada con facer crecer o dominio co maior número de dominios posible. A segunda liña de traballo está relacionada co apoio a iniciativas en consonancia coa cultura, lingua e tecnoloxía en Galicia que é onde investimos os nosos esforzos. A terceira liña, quizá a menos visible pero que talvez sexa a máis importante é a representación que fai o dominio nos ámbitos onde se decide o funcionamento da Rede. Ao ser un dominio rexistrado na ICANN, estamos representados en todas as entidades relacionadas con dominios e rexistradores, ámbitos onde debatemos temas relacionados con todo aquilo que importa á Rede, elementos que son máis difíciles de achegar á cidadanía e por iso debátense neses ámbitos. Desta forma, o estar dentro destes círculos dando o noso humilde punto de vista, poder traer como retorno información para que a xente vaia coñecendo as implicacións que ten o funcionamento da Rede, para nós é importante ter voz neses círculos e por iso é importante usar esa voz.