O lucense José María Méndez, novo CEO de CriteriaCaixa, que gañou 2.325 millóns en 2025

Un galego estará a partir de agora á fronte de CriteriaCaixa, o holding que administra o patrimonio empresarial da Fundación A Caixa e un dos maiores investidores institucionais do Estado. O lucense José María Méndez, que até agora exercía como director xeneral da compañía, foi nomeado conselleiro delegado (CEO) na reunión do consello de administración celebrada este martes, na que tamén se aprobaron as contas do exercicio 2025. O nomeamento pon fin a un período de case un ano sen figura executiva de primeiro nivel no holding, tras a saída do anterior CEO, Àngel Simon, en abril de 2025.

O presidente da Fundación A Caixa e de CriteriaCaixa, Isidro Fainé, xustificou a elección de Méndez pola súa capacidade para "seguir impulsando ao holding no ecosistema investidor europeo". O propio Méndez agradeceu a confianza depositada nel e reiterou o seu compromiso coa creación de valor a longo prazo, subliñando que a súa prioridade é tamén garantir o chamado dividendo social, é dicir, os recursos que CriteriaCaixa transfire á obra da Fundación A Caixa para financiar proxectos sociais, científicos e culturais en todo o territorio.

Os resultados que avalan este nomeamento son contundentes. CriteriaCaixa pechou 2025 cun beneficio neto de 2.325 millóns de euros, o que supón multiplicar por máis de dous as ganancias do exercicio anterior, cun incremento do 120%. Con todo, boa parte dese crecemento débese a operacións extraordinarias: o auto-#OPA lanzada por Naturgy achegou 306 millóns, a venda da empresa de aparcadoiros Saba e a súa posterior integración no grupo Interparking sumou outros 270 millóns, e as desinversiones en renda variable cotizada xeraron 559 millóns adicionais.

GANACIAS DE MARCA

Máis aló deses impactos puntuais, o resultado recorrente —o que reflicte a actividade ordinaria do holding— creceu un 7% até os 1.616 millóns de euros, o que evidencia unha base de negocio sólida. A principal panca dese resultado ordinario foron os dividendos recibidos das súas empresas participadas, que en conxunto rozaron os 1.900 millóns de euros. CaixaBank foi a fonte máis importante, con 1.006 millóns, seguida de Naturgy (434 millóns) e Telefónica (170 millóns). Completan o cadro ACS, The Bank of East Asia, Colonial e o Grupo Financeiro Inbursa, entre outras.

A carteira do holding revalorizouse con forza ao longo do ano. O Valor Neto dos Activos (NAV) ascendeu até os 39.611 millóns de euros, un 58% máis que ao peche de 2024, empuxado sobre todo pola extraordinaria evolución bolsista de CaixaBank, cuxa participación se revalorizou case un 100%, e de ACS, que subiu máis dun 75%. O Valor Bruto dos Activos superou os 44.700 millóns, un 47,5% por encima do ano anterior.

En termos de débeda, o holding tamén mellorou a súa posición: o endebedamento bruto reduciuse até 5.188 millóns de euros e o cociente de apalancamiento baixou ao 7,3%. O custo medio desa débeda situouse no 3,1%, cunha vida media de catro anos. En decembro pasado, a axencia Moody's elevou a cualificación crediticia de CriteriaCaixa a A3 con perspectiva estable, recoñecendo a solidez das súas métricas financeiras, mentres que Fitch mantén a súa nota en BBB+ estable.

RENOVACIÓN DO CONSELLO

A principal aposta investidora do exercicio foi a entrada no capital de Veolia, a multinacional francesa de servizos medioambientais, cun investimento de 1.077 millóns de euros que outorga a CriteriaCaixa un 5,1% da compañía. Tamén se adquiriu en decembro un 2,02% adicional do capital de Naturgy. Estas operacións enmárcanse na adaptación do Plan Estratéxico 2030, actualizado en novembro pasado para aliñalo cos obxectivos da Fundación A Caixa, que aspira a xestionar un orzamento anual de obra social de 800 millóns de euros en 2030.

Xunto ao nomeamento de Méndez, o Padroado da Fundación A Caixa, único accionista de CriteriaCaixa, acordou incorporar tres novos conselleiros independentes: Nuria Chinchilla, profesora do IESE; Julia Salaverría, experta en capital risco; e Xavier Brossa, auditor. O tres substitúen a José Antonio Asiáin Ayala, Marcos Contreras Manrique e Jean Louis Chaussade, que cumpriran 12 anos no cargo e perdían así a súa condición de independentes segundo a normativa aplicable.

Con estes cambios, o consello de administración de CriteriaCaixa —integrado por 15 membros— alcanza o 40% de conselleiras, en liña cos estándar do Código de Bo Goberno das sociedades cotizadas, aínda que o propio holding non cotiza en bolsa. A renovación busca, en palabras do propio Fainé, reforzar a diversidade e o bo goberno nun momento de expansión do holding dentro do panorama investidor europeo.