O transporte da Coruña retomará a folga indefinida o mércores tras o rexeitamento maioritario ao preacordo

Os traballadores do transporte de viaxeiros na provincia da Coruña volverán aos paros indefinidos desde este mércores, 11 de febreiro, tras tombar de forma abafadora o preacordo alcanzado entre UXT, CC.OO. e a patronal do sector. A decisión foi adoptada nas asembleas celebradas este venres na Coruña, Santiago e Ferrol, onde participaron preto de 500 empregados. Na votación, o “non” ao pacto impúxose de maneira rotunda, con 831 votos en contra e 336 a favor, segundo fontes sindicais.

O sector —que acumula xa dez xornadas de paro nos últimos dous meses— afronta así un novo capítulo dun longo conflito laboral que afecta a miles de usuarios do transporte interurbano e escolar na provincia. Os traballadores denuncian a perda de dereitos e a falta de avances reais nun convenio que leva máis de catro anos sen renovar.

Último intento de diálogo este luns

Antes de que a folga se renove, as partes veranse este luns 9 de febreiro, ás 13:00 horas, no Consello Galego de Relacións Laborais. A cita perfílase como o último intento para desbloquear unha negociación marcada pola división sindical. #UXT e CC.OO. defenden o preacordo como un paso necesario, mentres que a CIG o considera unha cesión excesiva ante a patronal.

Como xesto de presión previa, os traballadores están convocados a unha concentración ás 11:00 na estación intermodal de Santiago. Este tipo de mobilizacións repetíronse nas últimas semanas fronte á Xunta e ante as sedes de varias empresas concesionarias, segundo informou Radio Galicia.

A “letra pequena” que rompeu o pacto

Desde a CIG, o responsable comarcal Inácio Pavón subliñou que o desacordo non se debe só ao importe económico, senón á “letra pequena” do acordo, que deixaba en mans de cada empresa a aplicación de certos pluses, como os 1.000 euros anuais de absentismo. Os traballadores tamén consideran insuficiente a subida salarial do 3,4% prevista para 2025 e 2026 e reclaman reducir a xornada laboral anual, actualmente fixada en 1.800 horas, unha das máis altas de España no sector.

As acompañantes de transporte escolar, outro dos colectivos afectados, alertan de que o texto supuña recortes nas súas condicións laborais. Sinalan tamén a precariedade do persoal contratado por empresas subcontratadas segue sendo un dos principais focos de malestar.

Críticas á Xunta e previsión de caos na mobilidade

A CIG volveu a reprochar á Xunta a súa “falta de implicación” nun conflito que afecta a un servizo público esencial. O sindicato pide ao Goberno galego que medie entre patronal e persoal para evitar o colapso da mobilidade, especialmente en contornas rurais e no transporte escolar.

 Desde a Confederación Galega de Empresarios non se pronunciaron aínda sobre a convocatoria do luns, mentres que a Consellería de Infraestruturas mantén que o seu papel é “facilitador” do diálogo.

Se non se logra un acordo antes do mércores, prevese unha xornada especialmente complicada, con coincidencia da folga do transporte por estrada e os paros convocados por maquinistas de Renfe en Santiago de Compostela.