O PSdeG avisa: o fallo do TJUE non desbloquea eólicos paralizados por motivos medioambientais

A portavoz socialista de Enerxía do Parlamento galego, Patricia Igrexas, celebra o fallo do Tribunal de Xustiza da Unión Europea que avala que non haxa que someter a acceso público os informes sectoriais en proxectos eólicos, polo que o Tribunal Superior de Xustiza de Galicia (#TSXG) "mantiña paralizado o desenvolvemento de numerosas actividades", pero "tras este fallo vanse a poder pór en marcha".

Con todo, advirte de que a sentenza "non desbloquea os parques paralizados por razóns medioambientais", do que responsabiliza á Xunta, que "leva 16 anos tramitando cun plan de 1997".
 

A xuízo do PSdeG, a decisión do TJUE deste venres "avala a defensa do Goberno de España" respecto do sector eólico, á vez que "desmantela a propaganda do PP". De feito, cre que "é un claro respaldo ao bo facer do Executivo progresista, que defendeu este caso e que conseguiu unha resolución que achega seguridade xurídica ao sector".

Así, a Xunta "debería recoñecer este éxito institucional, porque mesmo a entón ministra Teresa Ribera ofreceu colaboración e apoio ao Goberno galego nesta materia desde o minuto un, ao estar tratando unha lei estatal", explica a parlamentaria socialista.

No entanto, Patricia Igrexas deixa claro que non se desbloquean os suspendidos polo TSXG por motivos medioambientais, dado que responsabiliza á Xunta de seguir unha normativa "obsoleta" que non se adaptou ás directivas comunitarias de hábitats nin á ampliación da Rede Natura. Reprocha que tampouco se modificou para acomodala á zonificación que se desenvolveu desde o Estado, como si fixeron outros territorios, incide, "comunidades que agora son líderes en renovables, como Aragón, Castela e León ou Valencia".
 

Nese sentido, a deputada alerta de que o Goberno de Rueda "segue autorizando parques en zonas ambientalmente non aptas". Por iso, recrimina que a Xunta do PP leva anos "dando bandazos sen facer os deberes e afundindo ao sector nunha inseguridade xurídica sen precedentes".