Greenalia, socia de Altri, saca da súa directiva aos ex-conselleiros Beatriz Mato e Antonio Couceiro

A exconselleira da Xunta Beatriz Mato deixou o consello de administración de Greenalia, segundo informa o Boletín Oficial do Rexistro Mercantil (Borme) deste xoves.

Mato incorporouse en xuño de 2021 ao consello de administración da empresa coruñesa de enerxías renovables, aínda que xa fichara en 2020 como directora de Desenvolvemento Corporativo.

Foi concelleira do PP no Concello da Coruña e conselleira durante a etapa de Alberto Núñez Feijóo como presidente da Xunta.

Durante case dez anos, de 2009 a 2018, foi conselleira da Xunta de Traballo e Benestar e Medio Ambiente e Ordenación do Territorio (2015-2018).

Greenalia é socia da multinacional portuguesa Altri no ambicioso plan de instalar en Palas de Rei (Lugo) unha macroplanta de celulosa a través dunha filial chamada Greenfiber. Esta subsidiaria está participada ao 75 % por Altri e 25 % pola empresa coruñesa Greenalia—

A Consellería de Medio Ambiente, dirixida por Anxos Vázquez, apoiou o proxecto cunha cuestionada Declaración de Impacto Ambiental (DIA) o 14 de marzo de 2025, tras recibir máis de 30 informes sectoriais, entre eles un de Augas de Galicia que concluíu que o proxecto "cumpre" cos obxectivos ambientais . A pesar diso, a DIA aprobouse con condicionantes.

A concesión desatou unha forte mobilización cidadá, con masivas protestas en Santiago, A Pobra do Caramiñal e Palas de Rei, onde decenas de miles de manifestantes consideran a fábrica unha "bomba ambiental,
.

Politicamente, o BNG, Sumar e o PSdeG-SOE situáronse en contra do proxecto; a portavoz do BNG, Ana Pontón, acusou o presidente Alfonso Rueda de “negacionista climático” e anunciou accións xudiciais e máis mobilización pública 

O proxecto aspiraba a 250 millóns de euros do PERTE de descarbonización, pero o Goberno central -en mans de PSOE e Sumar- denegou a axuda de 30 millóns aprobada por Industria, ao considerar que o plan non alcanzaba os criterios ambientais mínimos. Esta semana a ministra do MITECO ratificou que Greenfiber non contará con axudas públicas do Estado dado que, interpreta a ministra, é un proxecto non sostible.

Greenfiber reaccionou inmediatamente lembrando que a Xunta lle outorgou luz verde medioambiental, aínda que o permiso aínda non é definitivo. A Xunta tamén se pronunciou en fabor da industria, acusando o Estado de discriminar o proxecto a instalar en Galicia fronte a outros doutras partes de Estado.

Así as cousas, e dado que Altri recoñeceu que sen subvencións do Estado non é viable, é probable que se estea preparando unha batalla xudicial a varias bandas. De Greenfiber contra o Estado e dos ecoloxistas contra a Xunta. Uns preitos que se desenvolverán sen que haxa ex-conselleiros do PP na cúpula directiva de Greenalia. 

Quen controla Greenalia?

Os accionistas maioritarios de Greenalia son José María Castelán, presidente da compañía, e Manuel García, fundador e principal accionista. En 2022 finalizaron o proceso de OPA de exclusión do BME Growth.

A Xunta de Accionistas distribúese nun 94% para Smarttia (a sociedade de Manuel García) e o 6% controlado por José María Castelán (Alazady).

Noutro anuncio do Borme do pasado 15 de xuño, Greenalia comunicaba, ademais dos postos de José María Castelán e Manuel García no consello de administración, o cargo de Antonio Fernández-Montells como conselleiro executivo.

Mentres, Economía Dixital Galicia avanza este xoves a saída do presidente da Cámara de Comercio da Coruña, Antonio Couceiro, do consello de administración de Greenalia, exconselleiro con Manuel Fraga e expresidente do Deportivo.