10.000 pisos turísticos ilegais en Galicia, Moncloa esixe á Xunta abrirlles expedientes

O Ministerio de Consumo pon o foco en Galicia, onde seis de cada dez vivendas de uso turístico (VUT) operan sen cumprir a normativa. Segundo os datos trasladados ao Goberno galego desde o Ministerio nunha carta desvelada esta noite na SER, das 15.740 VUTs anunciadas en plataformas dixitais, 9.647 carecen da licenza autonómica preceptiva.

O ministro Pablo Bustinduy sinalou que esta situación require medidas inmediatas, propondo tres liñas de acción: instar os propietarios a retirar os anuncios, ordenar o cesamento da actividade e abrir expedientes sancionadores aos infractores.

Competencias repartidas nun sector complexo

A regulación das vivendas turísticas en Galicia é un puzzle de competencias. A nivel estatal, o Goberno central establece directrices xerais e supervisa o cumprimento de normativas, como as relacionadas coa publicidade de aloxamentos. 

As comunidades autónomas, neste caso a Xunta, teñen a potestade exclusiva de regular o sector turístico, incluíndo a concesión de licenzas para as VUT. Pola súa banda, os concellos poden limitar estas actividades mediante ordenanzas municipais ou plans urbanísticos, adaptando as restricións ás necesidades locais.

Na práctica, esta distribución xera tensións políticas. Mentres a Xunta xestiona o Rexistro de Empresas e Actividades Turísticas (REAT), os concellos, como fixeron Santiago ou Pontevedra, teñen capacidade de decretar certas restricións e esixir licenzas municipais específicas. Con todo, son minoría os municipios que regularon as VUT e aínda menos os que abriron expedientes aos propietarios que se saltan as regulacións locais. 

O 84% das VUT de Santiago son ilegais

O auxe descontrolado das VUT está a ter un impacto directo no encarecemento da vivenda en Galicia. A proliferación destes aloxamentos, especialmente en zonas turísticas como Pontevedra (4.500 VUT ilegais) e A Coruña (3.500), reduce a oferta de pisos para aluguer ou compra residencial. 

Isto dispara os prezos, dificultando o acceso á vivenda para os galegos, especialmente en áreas urbanas e costeiras.

A presión sobre o mercado inmobiliario é evidente. En cidades como Santiago, a conversión de vivendas tradicionais en turísticas xerou protestas veciñais, que denuncian non soa a alza de prezos, senón tamén molestias pola trasfega de turistas. A falta de control agrava o problema, xa que moitas VUT operan sen cumprir requisitos mínimos de seguridade ou calidade. 

Segundo Bustinduy na capital galega, só 66 das 406 VUT en Santiago de Compostela anunciadas en plataformas como Airbnb e Booking contan con autorización municipal. Aproximadamente cumpren as normas o 16 por cento. Bustinduy lembrou que o Ministerio ten aberto un expediente a unha destas plataformas por anunciar pisos turísticos sen licenza.