Daniel Lainz (Cortizo): "Os aranceis de Trump son insosteible, EE.UU. non produce aluminio suficiente"

A nosa aposta por este mercado segue sendo firme con sistemas preparados para fenómenos adversos como furacáns e tormentas tropicais 

Con exportacións de 28 millóns de euros anuais a EE.UU., como afectarán os aranceis do 25% á súa estratexia de crecemento nun mercado que, segundo as súas declaracións, están "a dobrar cada ano"? 

Por agora movémonos no terreo da incerteza. Non sabemos si eses aranceis vanse a aplicar ao tocho de aluminio, ao aluminio extruido ou aos produtos terminados, polo que é moi pronto para facer este tipo de cálculos. Para nós, a pesar de que o mercado estadounidense é un mercado incipiente no que crecemos en cifras do 100 % nos últimos anos, a imposición destes aranceis non suporía un problema tan grande como para outras empresas, xa que este país representa apenas o 1,5 % do noso volume de negocio. 

Neste sentido, a nosa aposta por este mercado segue sendo firme con sistemas preparados para fenómenos adversos como furacáns e tormentas tropicais propias dos países do Caribe e a costa este de os Estados Unidos que nos permiten dirixirnos a un estrato social medio alto ou alto ao que non lle importa tanto o incremento dos prezos senón as prestacións acústicas, térmicas e sísmicas dos nosos produtos. 

Os aranceis non son unha medida sostible a longo prazo, Estados Unidos non ten a capacidade de producir todo o aluminio que necesita para alimentar a súa propia industria

Dada a incerteza sobre si os aranceis aplicarán ao aluminio en bruto, perfís extruidos ou produtos terminados, que escenarios están a barallar para mitigar riscos a curto prazo?

En economía é case imposible reducir riscos, e máis nun sector como o noso no que cambian continuamente os prezos do aluminio. Nós non barallamos cambios nas nosas operacións nos Estados Unidos porque estes aranceis non son unha medida sostible a longo prazo. 

Estados Unidos non é un país industrialmente autosuficiente no aluminio, é dicir, non ten a capacidade de producir todo o aluminio que necesita para alimentar a súa propia industria, polo que a imposición prolongada destes aranceis provocaría un problema de inflación que afectaría a sectores como o da construción, un dos máis importantes do país. Cremos que, por ese motivo, esta medida suavizarase ou desaparecerá co tempo, non só polo ben dos que producimos fóra do país norteamericano, senón polo propio devir da súa economía. 

Falando de longo prazo, o sector metalúrxico require planificación a longo prazo dado o gran volume de diñeiro necesario para a infraestrutura que produce a alúmina. Como afecto esta guerra comercial á capacidade de investimento en proxectos de calado? Por pór un exemplo, a modernización de Alcoa San Cibrao pode non ser viable nesta contorna tan volátil. Parece difícil que ninguén vaia investir moito diñeiro neste ou outro proxecto do sector dado que ninguén pode producir como estará o comercio internacional de aluminio dentro dun par de anos …

O sector do aluminio nunca foi predicible, polo que a incerteza é un escenario no que sempre nos movemos e no que soubemos crecer. Aínda así, cremos que a incerteza podería provocar que algúns clientes dubiden da posibilidade de seguir traballando connosco como provedores habituais, o que ocasionaría unha retardación no noso crecemento no país norteamericano. 

Empresas do sector galegas como os seus veciños de Exlabesa teñen plantas en Xeorxia (#EE.UU.). Pode ser interesante comprar factorías en Estados Unidos para poder non quedar á marxe do mercado de Estados Unidos?

Tendo en conta que a medida se anunciou fai tan só un par de días e que non sabemos cal será o seu alcance, o mellor é manternos expectantes. De novo, cremos que non é unha medida sostible no tempo debido ás propias necesidades da industria estadounidense, polo que preferimos manternos ao carón e observar como evoluciona a situación sen tomar decisións precipitadas.   

As empresas non estamos exentas das tensións xeopolíticas trátase de non pór todos os ovos na mesma cesta

En 2018, Trump impuxo aranceis ao aceiro canadense, pero logo suspendeu medidas. Que ensinos extrae dese episodio sobre a duración real destas restricións?  

As empresas non estamos exentas das tensións xeopolíticas, por iso en Cortizo hai anos que apostamos pola internacionalización. Agora o foco está posto nos Estados Unidos, pero estas tensións poden dar con outros países. Estar presentes en máis de 80 países e en mercados tan diversos como os de Costa do Marfil ou Finlandia, Australia, Noruega, Albania ou Marrocos, fai que calquera xiro na política arancelaria sexa mellor absorbido pola empresa. Simplificando moito, trátase de non pór todos os ovos na mesma cesta. 

 Non cremos que a resposta a este bandazo xeopolítico sexa corresponder con outro.

A UE xa dixo que haberá tarifas. Non sería mellor contar até 100 antes de responder as tarifas impostas por Donald Trump?
 

Na actualidade non existen aranceis europeos ao aluminio estadounidense e non cremos que a resposta a este bandazo xeopolítico sexa corresponder con outro. Toda escalada arancelaria é negativa para o comercio internacional, por iso confiamos en que esta medida non se alargue moito no tempo.  Estamos preocupados no curto prazo, pero a medio e longo somos máis optimistas porque, repito, Estados Unidos non é industrialmente autosuficiente na produción de aluminio.