A mina de Touro, Cobre San Rafael, recolle currículos na Feira de Silleda e nunha carreira popular
Dado que aínda non ten permiso da Xunta, as promesas de contratación poderían quedar en nada. Os críticoso co proxecto interpretan esta campaña de recollida de datos persoais como parte da estratexia de Atalaia Mining para socavar a contestación social que foi clave para deter o primeiro proxecto de apertura hai uns anos.
Cobre San Rafael, a empresa que encabeza o proxecto para a reactivación da mina de Touro-O Pino, continúa coa súa campaña de recrutamento e informou de que ofrecerá información directa sobre as súas ofertas de emprego este sábado, 14 de setembro na Feira de Silleda e o domingo 15, na celebración do 'II Cros Country' en Touro.
Este esforzo, sostén a compañía nun comunicado, forma parte da planificación da apertura do seu proxecto mineiro-industrial nos concellos do Pino e Touro (na Coruña), onde a compañía busca cubrir 400 postos de traballo necesarios para o desenvolvemento da mina.
Durante ambos os eventos, un equipo especializado de Cobre San Rafael estará dispoñible para recoller currículos e ofrecer información detallada sobre as oportunidades de emprego, que abarcan tanto perfís cualificados como non cualificados.
Entre as áreas con vacantes destacan as operacións mineiras, a planta de tratamento de mineral e augas, os laboratorios, a xestión ambiental, seguridade e saúde, e administración.
Cobre San Rafael remarcou que esta campaña de contratación forma parte dun proxecto co que, ademais dos 400 postos de traballo iniciais, planea xerar un total de 1.600 empregos directos e indirectos ao longo dos próximos anos.
Escribe o teu comentario