Afectará o terremoto de Taiwan á produción en Stellantis Vigo por falta de chips?

Afectará o terremoto de Taiwan á produción en Stellantis Vigo? A cuestión non é baladí, pois a fábrica de Balaídos leva anos sufrindo paróns debido, precisamente, á falta de semiconductores. Ademais, esta mesma mañá, Stellantis Vigo comunicaba unha nova serie de interrupcións na produción debido a causas de forza maior cos compoñentes, que non explica.  Taiwan produce máis do 90% dos chips avanzados, os que se instalan, por exemplo, nos coches eléctricos. O mércores un poderoso terremoto de 7,4 graos golpeou a illa chinesa.

O tremor foi o maior nos últimos 25 anos. O balance provisional de vítimas foi de nove pero os feridos achéganse ao milleiro. 

Taiwan Semiconductor Manufacturing Company (TSMC), o maior produtor do mundo, tivo que parar temporalmente a súa produción. Hai que ter en conta que a técnica litográfica que se usa para esculpir o sílice dos microprocesadores é moi sensible ás vibracións.

TSMC dixo o mércores a última hora que o 70% da súa produción estaba en marcha. É dicir, o 30% seguía afectada media xornada despois do sismo matinal. Hai que ter en conta que algúns dos chips máis avanzados tardan semanas en producir, durante as cales non pode haber interrupcións causadas por movementos.
 

As máquinas que producen os chips adoitan ter sistemas de protección que deteñen o seu funcionamento automaticamente ante o impacto dun terremoto, para evitar danos maiores. Está por ver si a porcentaxe de máquinas que non se reactivaron sufriu danos e cal é o impacto final. 

“Unha pequena cantidade de ferramentas resultaron danadas en certas instalacións, impactando parcialmente as súas operacións. Con todo, non hai danos ás nosas ferramentas críticas”, dixo TSMC nun comunicado o mércores pola noite. 

Incluso unha leve caída da produción pode ter consecuencias para grandes clientes como Stellantis. Xa coa produción en niveis habituais, arrástranse problemas de abastecemento aos produtores de coches desde a pandemia.
 

Para protexer desta debilidade histórica na súa cadea de subministración, Stellantis anunciou fai un par de anos a creación dunha empresa mixta para a fabricación de chips para coches coa empresa taiwanesa Foxconn. Foxconn Technology Group comunicou onte que renovou gradualmente a produción a ritmo normal. A compañía lanzou unha mensaxe de tranquilidade argumentando que o terremoto tivo só un impacto operativo moi leve e que non houbo danos ao sistema de fabricación.

TSMC e Foxconn rexistraron perdas importantes na bolsa de Taiwan na xornada do terremoto, pero desde entón a súa cotización estabilizouse, un indicio de que os investidores estiman que a produción de chips non sufrirá un dano permanente, quizais só unha interrupción leve e temporal.
 

En definitiva, por agora non hai constancia de que o sismo vaia provocar un parón importante na produción de semiconductores. Agora ben, a cadea de produción dos chips é tan delicada que calquera interferencia -e o feito de que TSMC non confirme o retorno á normalidade ao 100% indica que hai un problema- pode acabar tendo consecuencias na distribución destes prezados compoñentes.

Stellantis non é, nin de lonxe, o único cliente potencialmente afectado. Os chips están omnipresentes en todos os produtos electrónicos. Hai anos que occidente tenta superar esta dependencia pero os enormes custos e desafíos tecnolóxicos que supón expandir a industria de produción de chips implicn que durante as próximas décadas, polo menos, o que suceda Taiwan, incluído o seu conflito con China, seguirá tendo unha importancia crave na economía mundial, tamén na de Vigo e Galicia.