Aumenta o número de persoas que marcaron a X da Igrexa na declaración da Renda en 2023

A Conferencia Episcopal Española ofreceu unha visión actualizada e prometedora da solidariedade fiscal cara á Igrexa católica. O xoves 14 de decembro, nunha rolda de prensa encabezada polo vicesecretario para Asuntos Económicos, Fernando Giménez Barriocanal, e José María Albalad Aiguabella, director do secretariado para o Sostemento da Igrexa, presentáronse os datos financeiros referentes á campaña da Renda do ano 2023, correspondentes ao exercicio fiscal de 2022.

O número de declaracións que optaron por apoiar á Igrexa ascendeu a 7.631.143 no conxunto de España, experimentando un crecemento de 209.218 con respecto ao ano anterior. Esta cifra non só mantén a tendencia previa senón que reflicte un incremento de contribuíntes que se decantan por asignar parte da súa cota tributaria á institución eclesiástica.

En termos monetarios, a Igrexa católica viu incrementado o seu fondo asignado en 38 millóns de euros, alcanzando un total de 358.793.580 euros. Este aumento do 11,9% contrasta co crecemento do 8,5% do ano precedente, o que denota un incremento na confianza e o compromiso dos cidadáns coas actividades da Igrexa.

A Secretaría de Estado de Facenda achegou datos adicionais que mostran un ascenso de 0,6 puntos porcentuais no conxunto de persoas que non marcaron ningunha casa de fins sociais ou da Igrexa, resultando nunha diminución marxinal da porcentaxe de asignantes á Igrexa en relación ao total de declarantes.

Por comunidades autónomas, 16 das 17 rexistraron un aumento no número de declaracións a favor da Igrexa, destacando Andalucía, Madrid, Comunidade Valenciana e Castela-A Mancha. En canto á proporción de asignación, notouse un crecemento en Cantabria , Baleares, Estremadura e Murcia.

A análise por importes asignados revela unha mellora na recadación en todas as rexións. Madrid, Andalucía, Comunidade Valenciana e Cataluña encabezaron os incrementos absolutos. Dez comunidades superaron a media en porcentaxe de asignantes, con especial atención en Castela-A Mancha, A Rioxa, Estremadura, Murcia e Castela e León.

APOIO Á INGLESIA CATÓLICA EN GALICIA

No caso de Galicia, esta comunidade autónoma recada máis de 13 millóns de euros en total a través desta casa. A que máis recada é Madrid, con máis de 100 millóns de euros, aínda que non é esta a que máis poboación marca esta casa. En Andalucía un total de 1.560.517 marcan a X a favor da Igrexa católica. Pola súa banda isto supón só un 38,17% fronte ao 43,91% de Castela-A Mancha.

Na comunidade galega, con todo, hai un baixo número de contribuíntes que destinen o 0,7% do seu imposto á Igrexa. Concretamente, fixérono este 2023 un total 340.932, un 23,96% dos que presentaron a declaración este ano.

A Arquidiocese de Santiago, pola súa banda, reportou que máis de 200.000 persoas marcaron a X da Igrexa na declaración de renda este ano 2023, sendo 7.000 delas novas incorporacións. 

O ecónomo diocesano de Santiago, Fernando Barros, expresou a súa gratitude polo "compromiso de todas as persoas que sosteñen a importante actividade da Igrexa compostelá", subliñando que estas achegas son vitais para o desenvolvemento das iniciativas pastorais e asistenciais.

A Conferencia Episcopal Española constatou un sólido soporte económico que reflicte "un importante respaldo ao labor da Igrexa", indican, permitíndolle así enfrontar o crecemento das necesidades sociais nun contexto económico desafiante. Aseguran así desde a Igrexa que os máis de 7,5 millóns de españois que optaron por marcar a casa da Igrexa na declaración da renda demostraron "un auténtico compromiso coa comuñón e a acción pastoral en lugares nos que, doutro xeito, sería case imposible".

QUE SON As X DA DECLARACIÓN DA RENDA?

Na declaración da renda existe a posibilidade de marcar cada ano dúas casas. Poden ser marcadas de maneira independente e non son de caracter obrigatorio en ningún caso.

Unha é a da Igrexa católica. Marcar unha X nesta casa á hora de presentar a declaración destina un 0,7% da cota do imposto ao funcionamento e sostemento económico da Igrexa católica.

Segundo indica a OCU, a Igrexa destina a maior parte do diñeiro recadado a través do seu X no financiamento das dioceses en España , concretamente un 79%. Un 9% deste monto destínase, pola súa banda, a pagar a Seguridade Social dos sacerdotes; un 2,4%, a achega a Cáritas Diocesana; un 2% a centros de formación; un 1,6% a proxectos de rehabilitación e construción de templos, e un 1,2% a realizar actividades pastorais.

A outra famosa casa na que podemos marcar ou non unha X é a casa de Interese Social. Esta casa dedica o 0,7% dos impostos do contribuínte ao apoio a persoas maiores en residencias e centros de día, a persoas con discapacidade física ou intelectual, a persoas sen fogar, á erradicación da violencia de xénero ou á integración laboral de mulleres, mozas e familias.

Marcar esta casa non supón para o contribuínte pagar máis ou menos. O contribuínte pode marcar unha das dúas casas (Igrexa católica ou Interese Social), pode marcar as dúas (repartindo un 0,7% a cada caso) ou pode non marcar ningunha, deixando ese monto do 1,4% á a recadación xeral do Estado.