O plan Galicia Sports 360, na Cidade Afouteza declarada ilegal, proxecto de interese autonómico para a Xunta

O Consello da Xunta celebrado este luns aprobou a declaración como proxecto de interese autonómico a Factoría do Deporte Galego-Galicia Sports 360 que o Real Club Celta de Vigo está a desenvolver en Mos (Pontevedra).
 

Así o informou o presidente do Executivo galego, Alfonso Rueda, na súa comparecencia ante os medios tras a reunión semanal do seu goberno, indicando que se trata dunha iniciativa que "transcende o ámbito municipal" pola súa repercusión "económica, social e cultural".

Tal como lembrou, esta declaración é un procedemento regulado por lei e xa en decembro de 2023 recibiuse o informe ambiental estratéxico da Dirección Xeral de Calidade Ambiental, Sostibilidade e Cambio Climático da Consellería de Medio Ambiente e Cambio Climático, no que se concluía non someter ao procedemento de avaliación ambiental estratéxico ordinario o proxecto, ao considerar que non se producirían efectos significativos no medio ambiente.
 

Esta declaración permitirá "axilizar os trámites e a execución das actuacións que sexan necesarias", indicou Rueda, destacando que o proxecto busca converter a Galicia "nun referente internacional da formación, investigación e industria do deporte".

O futuro complexo deportivo contará con tres agrupacións de infraestruturas: a Cidade Deportiva Afouteza, o Centro Integral para a Capacitación da Industria do Deporte e a área de servizos.
 

Por iso, tanto no ámbito deportivo competitivo como pola súa vertente económica, este proxecto "transcende do ámbito municipal" e defende a idea do deporte como unha actividade de interese público que contribúe ao crecemento e á cohesión social, á igualdade de xénero, a mellorar o benestar dos cidadáns, entre outras cousas, segundo a Xunta.
 

"O proxecto de interese autonómico converterá a Factoría do Deporte Galego nunha iniciativa cun interese supramunicipal cualificado que vai máis aló do ámbito deportivo", engadiu o Executivo galego, insistindo en que a modernización do tecido empresarial posibilitará que o proxecto sexa un "referente" a nivel nacional e internacional, así como un "investimento estratéxico" para o futuro.