Premio do Comité Olímpico Español á cidade de Pontevedra pola súa contribución ao deporte
O alcalde de Pontevedra, Miguel Anxo Fernández Lores, informou da concesión por parte do Comité Olímpico Español da placa olímpica do COE a Pontevedra en recoñecemento á súa "valiosa contribución na promoción do deporte".
Segundo explicou o alcalde, este recoñecemento chega despois da proposta realizada polas federacións de natación e tríatlon e foi apoiada "por todo o mundo".
Así, Miguel Anxo Fernández Lores acudirá a Madrid o próximo 28 de maio para recoller esta placa olímpica. "É un orgullo", valorou o rexedor.
O presidente do COE, Alejandro Branco, foi o que comunicou ao goberno municipal a concesión deste distintivo honorífico.
Por todo iso, o alcalde de Pontevedra considera que esta concesión recoñece a aposta da cidade polo deporte basee, o apoio aos clubs e á organización de competicións.
Tamén subliñou Fernández Lores que este premio é mérito, especialmente, do servizo municipal de deportes, polo que avanzou que quere ir acompañado do xefe deste servizo, Jaime Agulló, ao considerar que o seu traballo e coordinación foron unha "peza fundamental" para converter a Pontevedra en referente.
Así mesmo, Lores celebrou que en Pontevedra se ve "recoñecida de novo esa actividade deportiva que se realiza na cidade, a través de campionatos de España, de Europa e do mundo".
"Pontevedra é a cidade do deporte a todos os niveis", destacou o rexedor, que sinalou que "apenas hai un fin de semana no que non hai unha competición deportiva", xerando un gran retorno económico e social á cidade.
A gran cita deste ano chegará en xuño, co campionato do mundo Multideporte de tríatlon.
Escribe o teu comentario