Horarios e zonas do Rali Berberecho, a festa do motor en Noia que arrinca hoxe

Corredores nas súas marcas, rodas e motores a punto e o público ben situado para ver, un ano máis, aos máis intrépidos no Rali Berberecho de Noia, que este venres arrinca o seu XXXVIII Edición nun fin de semana cargado de emoción e homenaxes, en especial ao desaparecido Diego Mayo, ao que se lle renderá tributo durante o campionato. 

Co Campionato Xunta de Galicia a lume, o Rali Berberecho é a terceira etapa para os máis de 130 equipos que agardan a que o semáforo se poña en verde para pisar a fondo o acelerador. Con Víctor Senra de novo como favorito, a cita preséntase como unha oportunidade para un bo puñado de pilotos para dar a sorpresa e pór a competición patas para arriba. 

HORARIOS

Ademais, esta será unha edición especial ao celebrar as vodas de ouro da Escuadra Berberecho, que con medio século de vida ás costas reunirá a miles de fieis nos oito tramos cronometrados desta edición que non discorrerá polo tradicional tramo urbano por unha cuestión loxística.

Aínda que o bocado máis saboroso está reservado para o sábado, cando terá lugar a competición, este venres os afeccionados poderán gozar da cerimonia de saída, ás 20:30 horas na Alameda. Xa ao día seguinte haberá que madrugar se non nos queremos ver nada, xa que a festa arrinca ás 8:35 horas nunha xornada que se prolongará até practicamente a posta de sol.