A construción da cidade deportiva do Celta de Vigo salpica a Lete Lasa, denunciado ante Fiscalía

Afouteza, paciencia e máis dunha explicación faralle falta ao Celta de Vigo para explicar aos afeccionados e veciños de Mos o balbordo que segue xerando a construción da Cidade Deportiva Afouteza nesta localidade pontevedresa, unha infraestrutura declarada xa ilegal polo Tribunal Superior de Xustiza de Galicia (#TSXG). Agora, é a Xunta a que se ve implicada na ristra de denuncias que rodean a este caso, máis concretamente o secretario xeral para ou Deporte, José Ramón Lete Lasa, denunciado ante Fiscalía por Ecoloxistas en Acción, que o acusa de "ocultar información pública".

Desde a plataforma afirman que a Xunta negou acceso a unha copia do informe da Confederación Hidrográfica do Miño-Sil respecto da declaración de Proxecto de Interese Autonómico -fórmula usada pola administración galega para sortear as sancións xudiciais- ao proxecto 'Galicia Sport 360', pedra angular do futuro económico do Celta de Vigo e do propio Executivo galego. Nese sentido, censuran que a pesar de formular a solicitude baixo rexistro, "de conformidade co dereito de acceso á información pública ao amparo da Lei 19/2013, de 9 de diciembrem de transparencia, acceso á información pública e bo goberno e do artigo 26 da Lei 1/2016, de 18 de xaneiro, de transparencia e bo goberno (LTAIBG)".

A continuación, sinalan directamente a Lete Lasa como responsable de que en febreiro pasado se "inadmitiese a solicitude de acceso á información pública". "Ecoloxistas en Acción Galicia entende que a resolución do Secretario Xeral para o Deporte resulta absolutamente arbitraria, contraria ao dereito, de xeito evidente, tendo como única motivación pór impedimento no acceso á información a esta Asociación dado o seu activismo, molesto para os promotores do PIA e as administracións cómplices", reprende o colectivo.

O portavoz de Ecoloxistas en Acción, Eloy Pérez, denuncian que Lete Lasa "esconda á mantenta" unha información crucial para "a defensa ambiental dos montes comunais de Mos" mentres o propio secretario xeral promove un mecanismo "para poder expropiar terreo forestal de especial protección". 

"Ecoloxistas en Acción cre que os feitos poden integrar un delito de prevaricación do art. 404 do Código penal, e, por iso, solicitaron á Fiscalía que abra dilixencias e que estime si os documentos achegados son indiciarios da comisión dun delito ou dalgún outro tipo de responsabilidade", conclúe o comunicado.