O proxecto 'Galicia Sport 360' da Xunta e o Celta recibe a declaración de interese autonómico a pesar de ser ilegal

O Consello da Xunta deu luz verde a catalogar a Factoría do Deporte que impulsa Carlos Mouriño en Mos como un proxecto de interese autonómico. 

No entanto, o TSXG confirmou en abril que a cidade deportiva Afouteza do club vigués, pedra angular deste proxecto, é ilegal ao estar situada en montes comunais.

O presidente da Xunta, Alfonso Rueda, informou de que a Factoría do deporte galego-Galicia Sports 360 que o Real Club Celta de Vigo (RC Celta) impulsa no concello de Mos xa dispón da súa aprobación inicial como proxecto de interese autonómico. A tramitación continuará até concluír coa súa aprobación definitiva "dentro duns poucos meses".
 

Os proxectos de interese autonómico están regulados na lei de ordenación do territorio e o efecto principal desta declaración é que a planificación e execución das actuacións "transcenden o ámbito municipal e, por tanto, teñen unha tramitación singular que, en moitos casos, non fai necesarias as autorizacións municipais".

Esta figura pódese aplicar a iniciativas que superan o ámbito local, ben pola súa incidencia territorial, económica, social, ou cultural; pola súa magnitude; ou polas súas características singulares, e que non teñen previsión nin acomodo no plan urbanístico.

Neste sentido, o presidente salientou que a Factoría do deporte galego-Galicia Sports 360, do RC Celta, é un proxecto "relevante", que contará con tres agrupacións de infraestruturas: a Cidade Deportiva Afouteza, o Centro Integral para a Capacitación dá Industria do Deporte e, por último, a área de Servizos-Espazo Area.
 

Deste xeito, tanto polo ámbito estritamente deportivo-competitivo como pola súa vertente económica e de desenvolvemento, a Xunta entende que este proxecto "transcende o ámbito municipal e defende a idea do deporte como unha actividade de interese público que incide no crecemento e cohesión social, na igualdade de xénero, en mellorar o benestar da cidadanía".
 

Todo iso redunda, agrega, "no desenvolvemento do conxunto da comunidade, fortalecendo o carácter transversal sistema deportivo galego".

A Malata

Así mesmo, o Executivo galego investirá este ano case 550.000 euros en obras de mellora e reparación do estadio municipal da Malata a través dun acordo co concello de Ferrol, que autorizou o Consello da Xunta.
 

Con este paso búscase corrixir diversas deficiencias detectadas en materia de seguridade a causa da deterioración nunhas instalacións deportivas emblemáticas para a cidade ferrolá.

Segundo recolle o texto aprobado, o Concello de Ferrol encargarase de realizar as obras previstas, que inclúen a renovación das carpintarías metálica e de madeira, e das instalacións eléctrica, de fontanaría, de climatización e de ventilación.

Tamén se prevé a instalación de megafonía de seguridade e a limpeza e saneamento da cuberta, entre outras accións.