Nuno Pico e a súa primeira banda refundan 'Oh! Ayatollah' baixo o nome de 'Portosanto' co seu primeiro single

Houbo un tempo no que foron algo máis novos do que son hoxe en día. Era un tempo nos que Anaís, Andrés, Nuno, Simón e Xoel trasteaban con instrumentos en garitos que anunciaban para ese día o concerto de 'Oh! Ayatollah'. Cos anos foron tomando camiños distintos, co exemplo de Nuno Pico á fronte de 'Grande Amore', abrindo o seu propio camiño na música. Anos despois, a vella banda volve reunirse, agora baixo un novo nome e cos ánimos renovados. 

UN NOVO CAMIÑO

Baixo o selo de Ernie Records lánzanse nesta nova experiencia baixo o nome de 'Portosanto'. A súa posta de escena chega a través de 'Ten que haber un sitio para nós', o sinxelo co que despegan nesta nova aventura e que dará título ao álbum debut co que se darán a coñecer nuns meses.

Esta é a primeira pedra de toque deste reencontro que en pouco ou nada se parecerá a 'Oh! Ayatollah', pois agora se presentan cunha identidade nova nunha escena que cambiou moito desde aquel último concerto. Agora, o cinco músicos buscan, de novo, transitar unha senda onde se atreverán a "tensar, cuestionar e afinar cada idea até convertela en algo común". 

O disco chegará na primavera e, até entón, 'Portosanto' buscará ese sitio prometido e que aínda non atoparon, a pesar dos moitos intentos por abrir paso a cotenadas e golpes de guitarra se fai falta. "O resultado é unha canción directa, con vocación de himno íntimo, que atopa luz precisamente no recoñecemento da incerteza", detallan desde Ernie Records, que lles presenta este trampolín para lanzar á piscina, conscientes de que agora na escena galega hai moita auga e sitio para que todos poidan nadar e atracar no lugar que lles corresponde.