Esgotadas as prazas en charlas e talleres para familias sobre benestar impulsados pola Xunta

As charlas e talleres formativos dirixidos ás familias en materia de benestar, convivencia e tecnoloxía impulsados pola Xunta como novidade este curso esgotan as prazas ofertadas.

Precisamente, no marco da 'Estratexia galega de convivencia escolar', baixo o título 'A familia como base do crecemento persoal e emocional', este sábado desenvólvese unha xornada formativa en materia de benestar emocional na adolescencia no CIFP Politécnico de Santiago, cun aforamento de case 300 participantes.

Así mesmo, o novo programa 'Menores conectados: educación dixital en ciberseguridade e privacidade', impulsado pola Xunta, tamén encheu os 250 talleres ofertados, cunhas 6.300 persoas inscritas a través das ANPAS.

O conselleiro de Educación, Ciencia, Universidades e FP, Román Rodríguez, participou na apertura da xornada no Politécnico, na que subliñou que o fomento da convivencia nas aulas é "unha prioridade de Goberno" que require a participación de todos os axentes da comunidade educativa, tanto das familias como do profesorado e do propio alumnado, nesta "tarefa colectiva".

Acudiu acompañado pola directora xeral de Ordenación e Innovación Educativa, Judith Fernández, nun encontro que contou con especialistas en psicoloxía, psiquiatría e ciberseguridad para abordar cuestións como o establecemento de límites aos mozos e o uso responsable das novas tecnoloxías.

RELATORES
O experto Alexandre García Caballero, doutor en Psiquiatría e especialista no Complexo Hospitalario Universitario de Ourense (CHUO), foi o encargado de abrir a xornada co relatorio 'Axudando a crecer cando cambian vos marcos'.

Tamén interveñen Selva Orejón, consultora en ciberseguridad e identidade dixital e perito xudicial, directora executiva de OnBranding, coa charla 'Como ensinar ás túas fillas e fillos a usar a tecnoloxía de forma segura e responsable'. O programa péchase con 'Amor e límites para axudar ao teu adolescente', a cargo de María Velasco Ghisleri, especialista en Psicoterapia Integradora e Psicoterapia do Neno e do Adolescente.