O Resurrection Fest sae ao paso tras a polémica co fondo KKR, vinculado a Israel e a ocupación en Gaza

O Resurrection Fest publicou un comunicado este martes no que se desvincula totalmente do fondo estadounidense KKR, con intereses proisarelíes e que recentemente se fixo coa propiedade de Supestruct Entertainment, empresa que se encarga de organizar moitos dos principais festivais do país.

Tras coñecer esta información, foron moitos os grupos e artistas que expresaron a súa negativa a actuar en citas apoiadas por esta empresa.
 

Neste contexto, o festival que se celebra en Viveiro (Lugo) compartiu nas súas redes sociais un comunicado para "aclarar" as "graves acusacións" que circulan nos últimos días e que, aseguran, non son "veraces".

Así, arrincan condenando a masacre ao pobo palestino e mostran a súa solidariedade con eles no que cualifican de "crise humanitaria". "Sumámonos ás voces que piden o final desta situación", destacan.

Ademais, negan contundentemente que o festival "financie ningunha guerra". "Como moitos dos grandes festivais ou eventos culturais por todo o mundo, ademais das empresas locais que o organizan, o festival ten socios externos para poder asegurar o seu futuro nunha industria cada vez máis difícil e global", explican.

En 2022, tras a pandemia, asócianse coa plataforma de festivais independentes Supestruct. Esta empresa, alegan, conta con diversidade de socios internacionais, "entre os que fai tan só uns meses, atópase a empresa americana KKR, presente en centos de empresas dentro e fóra do noso país".

"Resurrection Fest quere deixar claro que non está vinculado a ningunha acción dos posibles investidores dos seus socios, distanciándonos deles e as súas accións", remarcan, asegurando que o festival "se mantén independente a eles e estes non teñen ningún tipo de control sobre a xestión do mesmo".
 

Nesta liña, lembran que detrás do festival hai empresas galegas que "manteñen total autonomía na súa xestión e toma de decisións desde a súa fundación até o día de hoxe, integrado por un equipo de máis de 1.000 traballadores directors, provedores locais, artistas, e público orixinario de máis de 40 países, cuxo impacto cultural e social na rexión e en todo o país é innegable".