Chemtrails aterra na Sala Radar de Vigo co ciclo Sinsal Primavera

Os concertos do Sinsal Primavera pretenden descubrir ao gran público novos sons, novos grupos, novas experiencias apartadas do mainstream. Este ciclo trae a Galicia a algunhas das bandas máis descoñecidas e, paradoxalmente, con máis proxección do panorama internacional, co exemplo dos ingleses Chemtrails, que farán o seu debut en Vigo no marco desta iniciativa promovida por Sinsalaudio e o Concello de Vigo.

UNHA VIAXE Ao PASADO MÁIS MODERNO

Chemtrails é unha banda de garage punk que non deixa indiferente a ninguén e que confeccionou un último traballo co que pór a bailar a todo o público. Os mancunianos levan preto dunha década xuntos rebentando guitarras con Mia Lust e Laura Orlova como vocalistas e guitarristas, acompañados por Liam Steers na percusión e Ian Kane ao baixo.

Como previa ao festivo do 1 de maio, a cita será este mércores 30 de marzo ás 21:30 horas na Sala Radar. As entradas xa están dispoñibles na web do Festival Sinsal -que xa prepara a súa próxima edición nas illas de San Simón e Santo Antón cun cartel totalmente secreto- e nas canles oficiais ademais de no propio despacho de billetes do recinto.

Influídos por bandas da talla de Pixies, Blondie ou Fat White Family, os ingleses prometen ofrecer un directo tan rompedor como pegadizo, sen renunciar á distorsión ou aos sintetizadores que nos transportarán ao século pasado. Serán, ademais, a antesala do próximo concerto do ciclo, que traerá aos belgas Bombataz á mesma sala, á mesma hora, este sábado 3 de maio.