Galicreques estreará doce espectáculos en Santiago do 12 ao 20 de outubro

Unha ducia de espectáculos estrearanse no XXIX Festival Internacional Galicreques, que se celebra en Santiago de Compostela de 12 ao 20 de outubro.

Entre estas estreas destaca 'Lémbrame. Spominaj na mnje', unha coprodución do Centro Dramático Galego, xunto á compañía galega Monicreques Alakrán e a alemá Bautzen Theater. Creada no marco do proxecto Phone, é unha homenaxe á memoria e pon en valor os idiomas galego e sorbio --de minoría étnica eslava--.

Así mesmo, a compañía galega Titiritres estreará 'Emotivas', que abrirá a programación escolar, sobre a amizade de tres personaxes: Melancolía, Irritación e Seguridade.

Outras estreas pasan por 'Un gran plan', da galega Olga Abad; así como dúas pezas de compañías portuguesas, 'As marionetas tambén tém coraçao' e 'Portugalidades' --sobre os 50 anos da Revolución do 25 de abril--.

Igualmente, compañías do Salvador, Arxentina, Colombia, Valencia e Andalucía presentarán as súas novas propostas neste Galicreques 2024.

Este festival está organizado pola Asociación Cultural Barriga Verde, coa colaboración do Concello de Santiago, Xunta de Galicia, Deputación da Coruña, Instituto Nacional de Artes Escénicas e Musicais (Inaem), Iberescena e Fundación SGAE.