Raida Adon, artista palestina, participará na Bienal de Arte de Pontevedra

O vicepresidente da Deputación de Pontevedra, Rafa Domínguez, confirmou que a artista e actriz palestina Raida Adon, refuxiada en París, será unha das participantes da recuperada Bienal de Arte. A artista visitou a cidade, onde puido percorrer da man do vicepresidente provincial as instalacións do Convento de Santa Clara.

A XXXII Bienal de Arte de Pontevedra, que regresa despois de 15 anos e terá lugar entre o 15 de xuño e 30 de setembro de 2025, "situará a cidade do Lérez no epicentro internacional da arte contemporáneo e será tamén un importante revulsivo económico para toda a provincia", dixo Rafa Domínguez.

Deste xeito, baixo o título 'Volver ser humanos... ante a dor dous demáis', a Bienal atraerá artistas destacados como Francesc Torres, Farida O-Gazzar, Patrice Warrener ou a propia Raida Adon, todos eles xa confirmados por Rafa Domínguez, e outros moitos de relevancia internacional.

A Bienal promoverá o intercambio cultural con propostas artísticas innovadoras, ofrecendo un espazo para a experimentación e a creatividade, e integrando a cidade no evento ao fomentar a participación dos veciños.

Raida Adon é unha artista palestina nada en 1972, formada no Departamento de Arte da Academia Bezalel de Artes e Deseño de Xerusalén. Foi mestra de arte na Academia Bezalel e no Sapir College of Art, ademais de directora do departamento de árabe da Escola de Fotografía de Xerusalén. A maior parte da súa obra correspóndese coa videoarte, na que mostra a situación palestina e israelí desde 1948.