Festivais Territorio dá o salto ao papel cun novo proxecto editorial

A cultura como motor económico e dinamizador de contornas rurais como a Ribeira Sacra ou o interior de Lugo. Esa é a motivación da marca Festivais Territorio, que comprende, entre outros, eventos como o Festival 17º Ribeira Sacra, unha das citas musicais máis esperadas do verán en Galicia e totalmente consolidada no sector -como avalan os seus múltiples galardóns e recoñecementos-, ou outros eventos como Esférica Rioxa Alavesa, Festival Canari ou Terra Bobal Fest. Dese compromiso firme nace agora o novo proxecto editorial de Festivais Territorio, cos revista 'Territorios'.

A publicación, de carácter cuadrimestral, conta co impulso da produtora I-radia Crea, que ten á música, a arte ou a gastronomía entre as súas liñas mestras. Dispoñible en institucións e librarías especializadas, a revista contará tamén cunha edición dixital. 

PRIMEIRO NÚMERO DE 'TERRITORIOS'

De todo isto informaron os organizadores nun evento celebrado no Centro Galego de Arte Contemporánea de Santiago de Compostela, que contou coa presenza de representantes da Xunta de Galicia, a Deputación de Álava, da Mancomunidade da Interior Terra do Viño- Terra Bobal ou dos concellos de Chantada e Sober, institucións que apoian esta publicación que agora inicia a súa andaina. 

A esencia deste magacín é o seu "forte compromiso cos territorios" e a súa aposta por "a riqueza e a diversidade", algo que reflicten tamén os Festivais Territorio. Carlos Montilla, director de I-radia Crea e da marca Festivais Territorio, estivo acompañada de Carme D. Prol, que asumirá a coordinación da revista, e de Xavier Belho, director de arte.

“Pretendemos dar voz a Territorios de futuro, que hoxe, máis que nunca, son esenciais querer apostar por unha sociedade cada vez máis sostible, igualitaria e integradora”, sinalan os promotores dunha publicación que contará no seu primeiro número coa ilustración de Annita Rivera, 'Plástica', así como con pezas que levan as firmas ilustres de Cristina V. Miranda, experta en mercadotecnia vinícola, ou Jorge Guitián, crítico gastronómico.